ఢిల్లీలో కాలుష్యంపై ఉక్కుపాదం.. తొలిరోజే రూ.68 లక్షల జరిమానాలు!

దేశ రాజధాని ఢిల్లీలో తీవ్రమవుతున్న వాయు కాలుష్యాన్ని నియంత్రించేందుకు అధికారులు 'వింటర్ యాక్షన్ ప్లాన్'‌ను కఠినంగా అమలు చేస్తున్నారు. ఇందులో భాగంగా తొలిరోజైన ఆదివారమే వాహన తనిఖీలు, నిర్మాణ ప్రదేశాల్లో నిబంధనల ఉల్లంఘనలపై కొరడా ఝుళిపించారు. ఒక్క రోజులోనే మొత్తం రూ.68.4 లక్షల జరిమానాలు విధించారు.

అధికారిక లెక్కల ప్రకారం, ఆదివారం సాయంత్రం 5 గంటల వరకు ట్రాఫిక్ పోలీసులు, రవాణా శాఖ అధికారులు కలిసి దాదాపు 15,000 వాహనాలను తనిఖీ చేశారు. పొల్యూషన్ అండర్ కంట్రోల్ సర్టిఫికేట్ (పీయూసీసీ) లేని 566 వాహనాలకు రూ.56.6 లక్షల జరిమానా విధించారు. సరిహద్దుల వద్ద నిబంధనలు ఉల్లంఘించి, ఢిల్లీలో ప్రవేశించడానికి ప్రయత్నించిన 1,539 వాహనాలను వెనక్కి పంపారు. వీరి నుంచి రూ.2 లక్షల ఫైన్ వసూలు చేశారు. బీఎస్-6 ప్రమాణాలు లేని ఇతర ప్రాంత వాహనాలను ఢిల్లీలోకి రాకుండా నిలిపివేశారు.

మరోవైపు, నిర్మాణ పనుల వల్ల ఏర్పడే దుమ్ము కాలుష్యంపై కూడా అధికారులు దృష్టి సారించారు. మొత్తం 300 నిర్మాణ ప్రాంతాలను తనిఖీ చేయగా, 32 చోట్ల నిబంధనల ఉల్లంఘనలు గుర్తించారు. వీరికి పర్యావరణ నష్టపరిహారం కింద రూ.9.8 లక్షలు విధించారు. కొన్ని నిర్మాణాలకు మూసివేత ఆదేశాలు, షోకాజ్ నోటీసులు జారీ చేశారు.

ఈ చర్యలపై ఢిల్లీ పర్యావరణ మంత్రి మంజిందర్ సింగ్ సిర్సా 'ఎక్స్'లో స్పందిస్తూ.. కాలుష్య నియంత్రణకు ప్రజలందరూ సహకరించాలని కోరారు. ఈ వింటర్ యాక్షన్ ప్లాన్ ఫిబ్రవరి 28 వరకు అమల్లో ఉంటుందని, ఈ కాలంలో పార్కింగ్ ఫీజుల పెంపు, ప్రభుత్వ, ప్రైవేట్ కార్యాలయాల్లో 50% హాజరు వంటి నిబంధనలు కూడా ఉంటాయని అధికారులు తెలిపారు. అయితే, సీఎన్‌జీ, ఎలక్ట్రిక్ వాహనాలకు, అత్యవసర సేవలకు ఈ నిబంధనల నుంచి మినహాయింపు ఇచ్చారు.