విద్యుత్ పునరుద్ధరణకు సాయం చేయండి.. తమిళనాడును కోరిన ఏపీ

‘అర్నాబ్’ తుపాను ధాటికి కుదేలైన ఆంధ్రప్రదేశ్‌లో విద్యుత్ పునరుద్ధరణ పనులను వేగవంతం చేసేందుకు రాష్ట్ర ప్రభుత్వం ముమ్మర చర్యలు చేపట్టింది. ఇప్పటికే తెలంగాణ ప్రభుత్వం నుంచి అందుతున్న సహాయానికి తోడు, తాజాగా తమిళనాడు సహకారాన్ని కూడా ఏపీ ప్రభుత్వం కోరింది. ముఖ్యమంత్రి నారా చంద్రబాబు నాయుడు ఆదేశాల మేరకు రాష్ట్ర విద్యుత్ శాఖ మంత్రి గొట్టిపాటి రవికుమార్, తమిళనాడు విద్యుత్ శాఖ మంత్రి సి.టి.ఆర్. నిర్మల్ కుమార్‌తో ఫోన్లో మాట్లాడారు.

తుపాను కారణంగా రాష్ట్రంలో, ప్రధానంగా విద్యుత్ రంగానికి సంభవించిన అపార నష్టాన్ని గొట్టిపాటి రవికుమార్ ఈ సందర్భంగా తమిళనాడు మంత్రికి వివరించారు. ప్రభావిత ప్రాంతాల్లో విద్యుత్ సరఫరాను యుద్ధ ప్రాతిపదికన పునరుద్ధరించేందుకు అదనపు సిబ్బంది అవసరముందని పేర్కొన్నారు. ఈ క్లిష్ట సమయంలో తగినంత మంది విద్యుత్ సిబ్బందితో పాటు అవసరమైన పరికరాలను పంపి సహకరించాలని ఆయన విజ్ఞప్తి చేశారు.

మంత్రి గొట్టిపాటి విజ్ఞప్తికి తమిళనాడు మంత్రి నిర్మల్ కుమార్ సానుకూలంగా స్పందించారు. ఆంధ్రప్రదేశ్‌కు అవసరమైన సిబ్బందిని, సామగ్రిని పంపేందుకు తమ ప్రభుత్వం సిద్ధంగా ఉందని ఆయన హామీ ఇచ్చారు. కాగా, విద్యుత్ పునరుద్ధరణ పనుల కోసం ఏపీ ప్రభుత్వం ఇప్పటికే తెలంగాణ నుంచి సహాయం పొందుతున్న విషయం విదితమే. తెలంగాణ సరిహద్దు జిల్లాలకు చెందిన విద్యుత్ సిబ్బంది ప్రస్తుతం ఏపీలోని తుపాను ప్రభావిత ప్రాంతాల్లో సహాయక చర్యల్లో చురుగ్గా పాల్గొంటున్నారు.