'ఆర్‌సీ17'లో చరణ్ సరసన తెలుగమ్మాయి?.. ఎవరీ సాత్విక వీరవల్లి?

మెగాప‌వ‌ర్‌ స్టార్ రామ్ చరణ్, క్రియేటివ్ డైరెక్టర్ సుకుమార్ కలయికలో ‘రంగస్థలం’ వంటి ఇండస్ట్రీ హిట్ తర్వాత రాబోతున్న పాన్ ఇండియా చిత్రం 'ఆర్‌సీ17'పై అంచనాలు ఆకాశాన్నంటుతున్నాయి. మైత్రీ మూవీ మేకర్స్ ప్రతిష్ఠాత్మకంగా నిర్మిస్తున్న ఈ భారీ ప్రాజెక్ట్ ముహూర్తపు పూజా కార్యక్రమాలు నవంబర్ 1న వైభవంగా జరగనున్నాయి. 

సినిమా సెట్స్‌పైకి వెళ్లేందుకు సర్వం సిద్ధమవుతున్న ఈ తరుణంలో చిత్ర కథానాయిక ఎంపిక టాలీవుడ్‌లో హాట్ టాపిక్‌గా మారింది. ఈ రేసులో ఎందరో ప్రముఖ నటీమణులను వెనక్కి నెట్టి, అమెరికాలో పుట్టి పెరిగిన తెలుగమ్మాయి సాత్విక వీరవల్లికి అవకాశం దక్కినట్లు బలమైన ప్రచారం జరుగుతోంది.

'ఆర్‌సీ17' ప్రకటన వెలువడిన నాటి నుంచే హీరోయిన్ ఎవరనే దానిపై అనేక ఊహాగానాలు వినిపించాయి. గతంలో చైల్డ్ ఆర్టిస్ట్‌గా మెప్పించి, ‘ధురంధర్’ సిరీస్‌తో విజయాలు అందుకున్న సారా అర్జున్‌తో పాటు రుక్మిణి వసంత్, అనీత్ పడ్డ, అనస్వర రాజన్ వంటి యువ నటీమణుల పేర్లు ప్రముఖంగా పరిశీలనలో ఉన్నట్లు వార్తలొచ్చాయి. 

అయితే, దర్శకుడు సుకుమార్ తనదైన శైలిలో కథలోని గ్రామీణ వాతావరణానికి, పాత్రలోని సహజత్వానికి సరిగ్గా సరిపోయే కొత్త ముఖం కోసం అన్వేషించినట్లు తెలుస్తోంది. ఈ క్రమంలోనే ఆయన దృష్టి సాత్విక వీరవల్లిపై పడినట్లు సమాచారం. ఇప్పటికే ఆమె స్క్రీన్ టెస్ట్, నటన పట్ల చిత్ర బృందం సంతృప్తిగా ఉందని, రామ్ చరణ్ సరసన ఆమె ఎంపిక దాదాపు ఖరారైందని ఫిల్మ్‌నగర్ వర్గాలు కోడై కూస్తున్నాయి.

అందరి దృష్టి సాత్విక వీరవల్లిపైనే! 
ప్రస్తుతం అందరి దృష్టిని ఆకర్షిస్తున్న సాత్విక వీరవల్లి బహుముఖ ప్రజ్ఞాశాలి. ఆమె అమెరికాలో జన్మించినప్పటికీ, ఆమె కుటుంబ మూలాలు తమిళనాడులోని చెన్నైకి చెందిన తెలుగు కుటుంబానికి సంబంధించినవి. చదువులో అత్యుత్తమ ప్రతిభ కనబరిచిన సాత్విక, అమెరికాలోని ప్రఖ్యాత యూనివర్సిటీ ఆఫ్ ఇల్లినాయిస్, వాండర్‌బిల్ట్ యూనివర్సిటీల నుంచి ఇంజనీరింగ్ పట్టాలు అందుకున్నారు. 

విద్యతో పాటు భారతీయ శాస్త్రీయ నృత్యంలోనూ ప్రావీణ్యం సంపాదించారు. నటనపై ఉన్న ఆసక్తితో చిత్రసీమలోకి అడుగుపెట్టిన ఆమె, ఇప్పటికే దర్శకుడు పవన్ సాదినేని దర్శకత్వంలో, ప్రముఖ నటుడు దుల్కర్ సల్మాన్ హీరోగా తెరకెక్కుతున్న ‘ఆకాశంలో ఒక తార’ చిత్రంలో హీరోయిన్‌గా చేస్తున్నారు. 

తొలి సినిమా విడుదల కాకముందే, రామ్ చరణ్-సుకుమార్ వంటి భారీ పాన్-ఇండియా కాంబినేషన్‌లో అవకాశం దక్కించుకోవడం సాత్విక కెరీర్‌కు ఒక‌ మైలురాయిగా నిలవనుంది. సుకుమార్ మార్క్ భావోద్వేగాలు, చరణ్ మాస్ స్క్రీన్ ప్రెజెన్స్‌తో రానున్న ఈ చిత్రంలో తెలుగమ్మాయికి అవకాశం దక్కడంపై సినీ ప్రియుల్లో ఆసక్తి నెలకొంది. 

నవంబర్ 1న జరగనున్న పూజా కార్యక్రమాల్లో కథానాయిక ఎవరనే దానిపై అధికారిక ప్రకటన వెలువడే అవకాశం ఉన్నందున, ఈ వార్తలపై పూర్తి స్పష్టత కోసం మరికొన్ని గంటలు వేచి చూడక తప్పదు.