పేదరికంపై భారత్ గెలుపు.. ప్రపంచ బ్యాంకు ప్రశంసలు

పేదరిక నిర్మూలనలో ప్రపంచంలోనే అత్యంత వేగంగా పురోగమిస్తున్న దేశాల్లో ఒకటిగా భారత్ నిలిచిందని ప్రపంచ బ్యాంకు వెల్లడించింది. 2011 నుంచి 2023 మధ్య 12 ఏళ్ల కాలంలో దేశంలో సుమారు 496 మిలియన్ల మంది (దాదాపు 50 కోట్లు) ప్రజలు పేదరికం నుంచి బయటపడ్డారని తన తాజా నివేదికలో పేర్కొంది. ఇదే సమయంలో తీవ్ర పేదరికం 27.1 శాతం నుంచి కేవలం 2.6 శాతానికి పడిపోయిందని తెలిపింది.

ప్రపంచ బ్యాంకు విడుదల చేసిన 'అక్టోబర్ 2026 ఇండియా పావర్టీ అండ్ ఈక్విటీ బ్రీఫ్' నివేదిక ప్రకారం, రోజుకు 4.20 డాలర్ల (సుమారు రూ. 350) కంటే తక్కువ ఆదాయంతో జీవించే జనాభా 2011లో 57.7 శాతం ఉండగా, 2023 నాటికి అది 16.1 శాతానికి తగ్గింది. తీవ్ర పేదరికానికి సూచికగా భావించే రోజుకు 3 డాలర్ల (సుమారు రూ. 250) ఆదాయ పరిమితి కంటే దిగువన ఉన్న వారి సంఖ్య 27.1 శాతం నుంచి 2.6 శాతానికి పడిపోయింది. దేశంలో వినియోగం పెరగడం, ఉపాధి అవకాశాలు మెరుగుపడటం, ఆహార సబ్సిడీల వంటి ప్రభుత్వ సామాజిక బదిలీ పథకాల వల్లే ఈ అద్భుతమైన ప్రగతి సాధ్యమైందని నివేదిక విశ్లేషించింది.

ముఖ్యంగా 2017-2023 మధ్య కాలంలో దేశంలో కొత్తగా 134 మిలియన్ల ఉద్యోగాలు సృష్టించబడ్డాయని, ఇందులో గ్రామీణ ప్రాంత మహిళలు వేతనంతో కూడిన పనుల్లోకి రావడం కీలక పాత్ర పోషించిందని ప్రపంచ బ్యాంకు తెలిపింది. అయితే, కొత్తగా వచ్చిన ఉద్యోగాల్లో చాలా వరకు తక్కువ ఉత్పాదకత ఉన్న రంగాల్లోనే ఉండటంతో, ఉద్యోగుల వాస్తవ వేతనాల్లో పెద్దగా మార్పు కనిపించలేదని పేర్కొంది.

పేదరికం గణనీయంగా తగ్గినప్పటికీ, దేశంలో ఆదాయ అసమానతలు ఇప్పటికీ తీవ్రంగానే ఉన్నాయి. అత్యధిక వేతనం పొందే మొదటి 10 శాతం మంది ఉద్యోగుల ఆదాయం, అత్యల్ప వేతనం పొందే చివరి 10 శాతం మంది కంటే 13 రెట్లు ఎక్కువగా ఉంది. అలాగే, పట్టణ ప్రాంతాల్లో పేదరికం 8.6 శాతంగా ఉండగా, గ్రామీణ ప్రాంతాల్లో ఇది 19.3 శాతంగా నమోదైంది. భవిష్యత్తులో పేదరికాన్ని మరింత తగ్గించాలంటే వ్యవసాయేతర రంగాల్లో అధిక ఉత్పాదకత, నాణ్యమైన ఉద్యోగాలను సృష్టించడంపై దృష్టి పెట్టాలని ప్రపంచ బ్యాంకు సూచించింది.