మిత్రధర్మం పాటించాల్సిందే.. టీడీపీ ముఖ్య నేతలకు చంద్రబాబు కీలక ఆదేశాలు

రాబోయే స్థానిక సంస్థల ఎన్నికల నేపథ్యంలో ఆంధ్రప్రదేశ్ ముఖ్యమంత్రి, టీడీపీ అధినేత నారా చంద్రబాబు నాయుడు పార్టీ ముఖ్య నేతలతో టెలీకాన్ఫరెన్స్ నిర్వహించారు. ఈ ఎన్నికలను అత్యంత సీరియస్‌గా తీసుకోవాలని, ప్రతిఒక్కరూ విజయమే లక్ష్యంగా పనిచేయాలని ఆయన దిశానిర్దేశం చేశారు. 'చెప్పాం-చేస్తున్నాం' అనే నినాదంతో ప్రభుత్వ విజయాలను ప్రజల్లోకి విస్తృతంగా తీసుకెళ్లాలని, అదే సమయంలో మిత్రధర్మాన్ని తప్పనిసరిగా పాటించాలని స్పష్టం చేశారు.

టెలీకాన్ఫరెన్స్‌లో చంద్రబాబు మాట్లాడుతూ.. "2024 సార్వత్రిక ఎన్నికల్లో అద్భుత విజయం తర్వాత మనం ప్రజలకు ఇచ్చిన హామీలను నెరవేరుస్తున్నాం. 151 సీట్లతో గెలిచి అరాచకాలు సృష్టించిన గొడ్డలి పార్టీని ప్రజలు కేవలం 11 సీట్లకే పరిమితం చేసి తిరుగుబాటు చేశారు. ఇప్పుడు మనం అధికారంలోకి వచ్చాక సంక్షేమం, అభివృద్ధి కార్యక్రమాలను పెద్ద ఎత్తున చేపట్టాం. ప్రభుత్వ సేవలను సులభతరం చేస్తూ సుపరిపాలన అందిస్తున్నాం. ఈ మంచి పనులను ప్రజలకు వివరించాలి" అని అన్నారు.

మిత్రధర్మం పాటించాల్సిందే..
కూటమి పార్టీల మధ్య క్షేత్రస్థాయిలో చక్కటి సమన్వయం ఉండాలని చంద్రబాబు గట్టిగా సూచించారు. "కూటమిలోని మూడు పార్టీల కార్యకర్తలు ప్రభుత్వానికి, ప్రజలకు మధ్య వారధులుగా నిలవాలి. మిత్రధర్మాన్ని పాటించడంలో ఎలాంటి వెసులుబాటు ఉండదు. మూడు స్థాయిల్లోనూ (కేంద్ర, రాష్ట్ర, స్థానిక) ఒకే ప్రభుత్వం ఉంటే జరిగే అభివృద్ధిని ప్రజలకు వివరించాలి. వార్డు, డివిజన్ మొదలు ప్రతి స్థానంలోనూ కూటమి జెండాలు ఎగరాలి" అని ఆయన స్పష్టం చేశారు.

కష్టపడ్డవారికి గుర్తింపు.. నామినేటెడ్ పదవులు
పొత్తులు, రిజర్వేషన్లు, సామాజిక సమీకరణాల కారణంగా కొంతమంది నేతలకు స్థానిక ఎన్నికల్లో అవకాశాలు దక్కకపోవచ్చని చంద్రబాబు అంగీకరించారు. "పార్టీ కోసం, రాష్ట్రం కోసం కష్టపడి పనిచేసిన వారికి తగిన గుర్తింపు ఉంటుంది. అలాంటి వారికి నామినేటెడ్ పదవులతో గౌరవిస్తాం. పాలనలో తాము కూడా భాగస్వాములమనే సంతృప్తి ప్రతి వర్గానికి కలగాలి. అందుకే బీసీలకు, చిన్న కులాలకు కూడా ఈ ఎన్నికల్లో ప్రాధాన్యత ఇచ్చాం" అని భరోసా ఇచ్చారు. అగ్ర నేతల నుంచి కార్యకర్తల వరకు అందరి పనితీరును రికార్డ్ చేస్తున్నామని తెలిపారు.

గొడ్డలి పార్టీపై ప్రజలను అప్రమత్తం చేయాలి
ప్రభుత్వం చేస్తున్న మంచిని వివరిస్తూనే, ప్రతిపక్షం చేస్తున్న దుష్ప్రచారాన్ని తిప్పికొట్టాలని చంద్రబాబు పిలుపునిచ్చారు. "గొడ్డలి పార్టీ వల్ల రాష్ట్రానికి జరిగే నష్టాన్ని ప్రజలకు వివరించాలి. ఆ పార్టీ అధ్యక్షుడు తన స్వార్థం కోసం రాష్ట్ర ప్రయోజనాలను ఎలా తాకట్టు పెడతాడో, కుటుంబ బంధాలను కూడా ఎలా పట్టించుకోడో ప్రజలకు తెలియజేయాలి. ప్రతి ఓటరు పోలింగ్ బూత్‌కు వచ్చి ఓటు వేసేలా చూడాలి. 2024 ఎన్నికల కంటే ఎక్కువ ఓట్లు ప్రతి బూత్‌లోనూ పడాలి" అని ఆయన లక్ష్య నిర్దేశం చేశారు.