హాఫ్ సెంచరీలతో చెలరేగిన ఫిలిప్స్, జాకబ్స్.. రెండో టీ20లో టీమిండియా టార్గెట్ ఎంతంటే..?

క్రైస్ట్‌చర్చ్ వేదికగా భారత్‌తో జరుగుతున్న రెండో టీ20లో న్యూజిలాండ్ భారీ స్కోరు నమోదు చేసింది. నిర్ణీత 20 ఓవర్లలో 5 వికెట్ల నష్టానికి 180 పరుగులు చేసింది. దీంతో టీమిండియా ముందు 181 ప‌రుగుల ల‌క్ష్యాన్ని నిర్దేశించింది. కివీస్ బ్యాట‌ర్లలో గ్లెన్ ఫిలిప్స్ (70), బెవాన్ జాకబ్స్ (56) హాఫ్ సెంచరీలతో కివీస్ ఇన్నింగ్స్‌కు వెన్నెముకగా నిలిచారు.

అంతకుముందు టాస్ గెలిచిన భారత కెప్టెన్ శ్రేయస్ అయ్యర్ బౌలింగ్ ఎంచుకున్నాడు. దీంతో బ్యాటింగ్‌కు దిగిన న్యూజిలాండ్‌కు ఆరంభంలోనే ఎదురుదెబ్బ తగిలింది. పవర్‌ప్లే ముగిసేలోపే 41 పరుగులకే 3 కీలక వికెట్లు కోల్పోయి కష్టాల్లో పడింది. ఈ క్లిష్ట సమయంలో జతకట్టిన గ్లెన్ ఫిలిప్స్, బెవాన్ జాకబ్స్ ఇన్నింగ్స్‌ను చక్కదిద్దారు. 

వీరిద్దరూ నాలుగో వికెట్‌కు ఏకంగా 116 పరుగుల భారీ భాగస్వామ్యం నెలకొల్పారు. ఫిలిప్స్ కేవలం 43 బంతుల్లో 4 ఫోర్లు, 4 సిక్సర్లతో 70 పరుగులు చేయగా, జాకబ్స్ 46 బంతుల్లో 5 ఫోర్లు, ఒక సిక్సర్‌తో 56 పరుగులు సాధించి జట్టుకు మంచి స్కోరు అందించారు.

భారత బౌలర్లలో అర్ష్‌దీప్ సింగ్ 33 పరుగులిచ్చి రెండు వికెట్లతో సత్తా చాటాడు. భువనేశ్వర్ కుమార్, ప్రిన్స్ యాదవ్, నితీశ్ కుమార్ రెడ్డి తలో వికెట్ పడగొట్టారు.

ఈ మ్యాచ్ కోసం భారత తుది జట్టులో రెండు మార్పులు జరిగాయి. ఇషాన్ కిషన్ స్థానంలో వైభవ్ సూర్యవంశీ, మయాంక్ యాదవ్‌కు బదులుగా ప్రిన్స్ యాదవ్ జట్టులోకి వచ్చారు. న్యూజిలాండ్ కూడా ఆడమ్ మిల్నే స్థానంలో జాకబ్ డఫీకి అవకాశం కల్పించింది.