కోచింగ్ లేకుండా.. చాట్‌జీపీటీతో ప్రిపరేషన్.. హర్యానా సివిల్స్‌లో సత్తా చాటిన యువతి!

పట్టుదల, సరైన ప్రణాళిక ఉంటే కోచింగ్ సెంటర్లతో పనిలేకుండానే ఉన్నత శిఖరాలను అధిరోహించవచ్చని నిరూపించింది హర్యానాకు చెందిన ఓ యువతి. హిసార్‌లోని డోగ్రాన్ మొహల్లాకు చెందిన 23 ఏళ్ల ఛవి సర్దానా, 2025 హర్యానా సివిల్ సర్వీసెస్ (హెచ్‌సీఎస్‌) పరీక్షల్లో ఐదో ర్యాంకు సాధించి అందరికీ ఆదర్శంగా నిలిచింది. ఎలాంటి కోచింగ్ తీసుకోకుండా కేవలం స్వీయ అధ్యయనం (సెల్ఫ్ స్టడీ)తో ఈ ఘనత సాధించడం విశేషం. ఈ పరీక్షలో ఆమె 675 మార్కులకు గాను 385.80 మార్కులు సాధించింది.

పటియాలాలో బీఏ ఎల్‌ఎల్‌బీ పూర్తిచేసిన ఛవి, తన న్యాయశాస్త్ర విద్యతో పాటే సివిల్స్ పరీక్షలకు సిద్ధమైంది. రోజూ సుమారు 8 గంటల పాటు చదివేది. ప్రిపరేషన్ సమయంలో ఫేస్‌బుక్, ఇన్‌స్టాగ్రామ్ వంటి సోషల్ మీడియా ప్లాట్‌ఫామ్‌లకు పూర్తిగా దూరంగా ఉన్నట్లు ఆమె తెలిపింది. 

క్లిష్టమైన అంశాలను అర్థం చేసుకోవడానికి, సమాచారం సేకరించడానికి టెక్నాలజీని వాడుకుంది. ఇందుకోసం చాట్‌జీపీటీని ఉపయోగించుకున్నానని చెప్పింది. స్థిరమైన ప్రిపరేషన్, సమయపాలన, అంకితభావమే తన విజయానికి కీలకమని ఛవి వివరించింది.

ఈ పరీక్షకు సంబంధించిన ప్రాథమిక దశలో సుమారు 60,000 మంది అభ్యర్థులు హాజరయ్యారు. ఏప్రిల్‌లో ప్రిలిమినరీ పరీక్ష, జూన్‌లో మెయిన్స్ జరిగాయి. అక్టోబర్ 3 నుంచి 8 వరకు పంచకులలో ఇంటర్వ్యూలు నిర్వహించారు. ఈ పరీక్షలో అభిషేక్ సరోహా 394.50 మార్కులతో టాపర్‌గా నిలిచారు. ముఖ్యంగా టాప్ 10 ర్యాంకుల్లో ఆరుగురు మహిళలే ఉండటం గమనార్హం.

ఛవి తండ్రి ఒక ప్రింటింగ్ ప్రెస్ నడుపుతుండగా, తల్లి గృహిణి. తన కుటుంబంలో ప్రభుత్వ అధికారి స్థాయికి చేరిన తొలి వ్యక్తి ఛవినే కావడం విశేషం. ఇప్పటికే పంజాబ్ సివిల్ సర్వీసెస్, యూపీఎస్సీ పరీక్షలు కూడా రాసిన ఆమె, వాటి ఫలితాల కోసం ఎదురుచూస్తోంది. ఛవి విజయం తెలియగానే ఆమె కుటుంబసభ్యులు, శ్రేయోభిలాషులు ఆనందంతో సంబరాలు చేసుకున్నారు.