ధోనీ చెప్పిన ఆ ఒక్క మాట.. భారత్‌పై మా గెలుపునకు కారణమైంది: విండీస్ కెప్టెన్‌ హోప్

మొహాలీలోని ముల్లన్‌పూర్‌లో నిన్న‌ జరిగిన మూడో వన్డేలో టీమిండియాపై వెస్టిండీస్ చారిత్రక విజయం సాధించింది. భారత్ నిర్దేశించిన 352 పరుగుల భారీ లక్ష్యాన్ని 5 వికెట్లు కోల్పోయి ఛేదించి, వన్డే క్రికెట్‌లో తమ అత్యధిక విజయవంతమైన ఛేదనను నమోదు చేసింది. ఈ అద్భుత విజయంలో వెస్టిండీస్ కెప్టెన్‌ షాయ్ హోప్ (162 నాటౌట్) కీలక పాత్ర పోషించాడు. 

అయితే, ఇంతటి భారీ లక్ష్యాన్ని ఛేదిస్తున్నప్పుడు తనను ప్రశాంతంగా నిలబెట్టింది భారత మాజీ కెప్టెన్ ఎంఎస్ ధోనీ ఇచ్చిన ఒక సలహా అని మ్యాచ్ అనంతరం హోప్ వెల్లడించడం విశేషం.

ఈ మ్యాచ్‌లో 50 ఓవర్ల పాటు వికెట్ కీపింగ్ చేసి, ఆ తర్వాత ఇన్నింగ్స్ ఓపెనర్‌గా బరిలోకి దిగిన షాయ్ హోప్.. ఆరంభం నుంచి చివరి వరకు అద్భుతమైన సంయమనంతో ఆడాడు. 143 బంతుల్లో అజేయంగా 162 పరుగులు చేసి జట్టును గెలుపు తీరాలకు చేర్చాడు. మ్యాచ్ మధ్యలో కండరాలు పట్టేసినా, ఏమాత్రం పట్టువిడవకుండా పోరాడాడు.

విజయం అనంతరం షాయ్ హోప్ మాట్లాడుతూ.. "భారీ లక్ష్య ఛేదనలో ఉన్నప్పుడు నాకు గొప్ప ఆటగాడైన ఎంఎస్ ధోనీ చెప్పిన మాటలు గుర్తొచ్చాయి. 'నువ్వు అనుకున్నదానికంటే నీకు ఎప్పుడూ ఎక్కువ సమయం ఉంటుంది' అని ఆయన ఒకసారి నాతో అన్నారు. ఆ మాటలే నాకు ఓపికగా ఉండేలా చేశాయి. లక్ష్యాన్ని చిన్న చిన్న భాగాలుగా విభజించుకుని ఆడాను" అని తెలిపాడు.

"ఓవర్ రేట్ కారణంగా భారత జట్టు చివరి ఓవర్లలో ఫీల్డర్లను సర్కిల్ లోపలికి తీసుకురావాల్సి వస్తుందని నాకు తెలుసు. అందుకే ప్రశాంతంగా వేచి చూశాను. భారత్‌లో మంచు ప్రభావం ఉండటంతో ఛేదన సులభమైంది. సిరీస్‌ను గెలుపుతో ముగించడం చాలా ఆనందంగా ఉంది. మా బ్యాటర్లు నిలకడగా రాణించారు, బౌలింగ్‌లో మరింత మెరుగుపడాల్సి ఉంది" అని హోప్ వివరించాడు. కాలికి గాయమైనప్పటికీ, రెండు రోజుల్లో ప్రారంభం కానున్న టీ20 సిరీస్‌కు అందుబాటులో ఉంటానని హోప్ ధీమా వ్యక్తం చేశాడు.