ఢిల్లీ వ్యక్తి దీనగాథ.. ఉద్యోగం పోవడంతో ఇంట్లో వంట బంద్ చేసిన భార్య!

ఢిల్లీకి చెందిన 42 ఏళ్ల ఒక వ్యక్తి జీవితం ఒక్కసారిగా తలకిందులైంది. ఈ ఏడాది జూన్‌లో ఉద్యోగం కోల్పోవడంతో ఆయన ఆర్థికంగానే కాకుండా, మానసికంగానూ తీవ్రంగా కృంగిపోయారు. ఆ నిరుద్యోగ ప్రభావం ఆయన వ్యక్తిగత జీవితంపై కూడా పడింది. ఇంట్లో పరిస్థితులు విషమించాయని, చివరకు తన భార్య కనీసం వంట చేసి పెట్టడానికి కూడా నిరాకరిస్తోందని ఆయన ఆవేదన వ్యక్తం చేశాడు.

2003 నుంచి కంటెంట్ పరిశ్రమలో పనిచేస్తున్న రాహుల్, గతంలో 'కెటలైజ్ రీసెర్చ్' అనే మార్కెట్ రీసెర్చ్ సంస్థలో విధులు నిర్వహించేవాడు. అయితే, సంస్థలో జరిగిన సిబ్బంది తగ్గింపు కారణంగా సరైన కారణం లేకుండానే తనను ఉద్యోగం నుంచి తొలగించారని ఆయన తెలిపాడు. గతంలో అధిక వేతనం వచ్చే ఉద్యోగాన్ని వ్యక్తిగత ఒత్తిళ్ల కారణంగా వదులుకున్న ఆయన, వృత్తిపరమైన స్థిరత్వం కోసం తక్కువ జీతానికైనా ఈ సంస్థలో చేరినట్లు వివరించాడు.

ఉద్యోగం కోల్పోవడంతో తన వైవాహిక జీవితంలోని కలతలు మరింత ముదిరాయని రాహుల్ వాపోయాడు. 2011లో వివాహమైన నాటి నుంచే దంపతుల మధ్య విభేదాలు ఉండేవని, ఉద్యోగం పోయాక భార్య ప్రవర్తనలో ఇంకా మార్పు వచ్చిందని ఆయన ఆరోపించాడు. "ఇంట్లో కనీసం వంట చేసుకోవాలన్నా, భోజనం చేయాలన్నా గొడవలు జరగకుండా చాలా జాగ్రత్త పడాల్సి వస్తోంది. వంటగదిని ఒక గూఢచారిలా రహస్యంగా వాడుకోవాల్సిన దుస్థితి ఏర్పడింది.. భార్య చూడకుండా తినాల్సి వస్తోంది" అని ఆయన తన దీనగాథను వెల్లడించాడు.

ప్రస్తుతం చేతిలో ఉన్న పొదుపు మొత్తం కరిగిపోవడంతో కనీస అవసరాలకు కూడా డబ్బుల్లేని పరిస్థితి నెలకొంది. రూ. 6,000 విద్యుత్ బిల్లు చెల్లించలేక, స్నేహితులు, లింక్డ్‌ఇన్ వేదికగా ఆర్థిక సాయం కోరాల్సి వచ్చిందని ఆయన తెలిపాడు. ఇంటర్వ్యూలకు వెళ్లే ప్రయాణ ఖర్చుల కోసం కేవలం రూ. 1,000 మాత్రమే మిగిలి ఉన్నాయని ఆయన చెప్పిన మాటలు పరిస్థితి తీవ్రతను కళ్లకు కడుతున్నాయి.

ఇన్ని ప్రతికూల పరిస్థితులు ఎదురవుతున్నప్పటికీ, రాహుల్ కుంగిపోకుండా ఉద్యోగ అన్వేషణపైనే దృష్టి సారించాడు. రెండు దశాబ్దాలకు పైగా అనుభవం ఉన్న ఆయన, త్వరలో ఒక ఇంటర్వ్యూకు హాజరుకాబోతున్నాడు. ఆ ఉద్యోగం లభిస్తే తన కష్టాలు తీరి, జీవితం మళ్లీ గాడిన పడుతుందని ఆయన ఆశాభావం వ్యక్తం చేస్తున్నాడు.