ఒక్క పరుగుతో తిలక్ వర్మ శ‌త‌కం మిస్‌.. కుప్పకూలిన సౌత్ జోన్.. ఈస్ట్ జోన్‌కు భారీ ఆధిక్యం

చెన్నై వేదికగా జరుగుతున్న దులీప్ ట్రోఫీ ఫైనల్‌లో ఈస్ట్ జోన్ పట్టు బిగించింది. సౌత్ జోన్‌పై తొలి ఇన్నింగ్స్‌లో 372 పరుగుల భారీ ఆధిక్యం సాధించి టైటిల్ గెలుపునకు చేరువైంది. ఈస్ట్ జోన్ తమ తొలి ఇన్నింగ్స్‌లో 708 పరుగులు చేయగా, అనంతరం బ్యాటింగ్‌కు దిగిన సౌత్ జోన్ 336 పరుగులకే ఆలౌటైంది. దీంతో ఈ మ్యాచ్ డ్రాగా ముగిసినా, తొలి ఇన్నింగ్స్ ఆధిక్యం ఆధారంగా ఈస్ట్ జోన్ విజేతగా నిలుస్తుంది.

నాలుగో రోజు ఆటలో భాగంగా 242/6 ఓవర్‌నైట్ స్కోరుతో బ్యాటింగ్ కొనసాగించిన సౌత్ జోన్‌ను కెప్టెన్ తిలక్ వర్మ ఆదుకునే ప్రయత్నం చేశాడు. చామ మిలింద్‌ (43)తో కలిసి స్కోరు బోర్డును ముందుకు నడిపించాడు. అయితే, సెంచరీకి కేవలం ఒక్క పరుగు దూరంలో 99 పరుగుల వ్యక్తిగత స్కోరు వద్ద తిలక్ వర్మ ఔటయ్యాడు.

సౌత్ జోన్‌ కేవలం 18 పరుగుల వ్యవధిలోనే చివరి నాలుగు వికెట్లను కోల్పోయింది. అంతకుముందు తొలి రెండు రోజుల్లో ఈస్ట్ జోన్ కెప్టెన్ ఇషాన్ కిషన్ (270) అద్భుతమైన డబుల్ సెంచరీతో జట్టుకు భారీ స్కోరును అందించిన విషయం తెలిసిందే. అతని ఇన్నింగ్సే ఈస్ట్ జోన్‌ను ఇంతటి పటిష్ఠ‌ స్థితిలో నిలబెట్టింది.