అనంతపురం-రాయదుర్గం హైవేపై ప్రమాదం.. ఇద్దరి మృతి, ఇద్దరికి తీవ్ర గాయాలు

అనంతపురం జిల్లాలో ఘోర రోడ్డు ప్రమాదం సంభవించింది. అతివేగంగా వెళ్తున్న ఇన్నోవా కారు అదుపుతప్పి బోల్తా పడటంతో ఇద్దరు వ్యక్తులు అక్కడికక్కడే ప్రాణాలు కోల్పోయారు. ఈ ప్రమాదంలో మరో ఇద్దరు తీవ్రంగా గాయపడ్డారు. ఈ విషాదకర సంఘటన నేటి తెల్లవారుజామున చోటుచేసుకుంది.

ప్రమాద వివరాల్లోకి వెళితే.. రాయదుర్గం-అనంతపురం జాతీయ రహదారిపై బ్రాహ్మణపల్లి గ్రామ సమీపంలో తెల్లవారుజామున సుమారు 3 గంటల సమయంలో ఈ దుర్ఘటన జరిగింది. వేగంగా వెళ్తున్న ఇన్నోవా వాహనం ఒక్కసారిగా అదుపుతప్పి రోడ్డుపై బోల్తా పడింది. ఈ ప్రమాదంలో కళ్యాణదుర్గం పట్టణానికి చెందిన రాఘవేంద్ర, నాగరాజు అనే వ్యక్తులు తీవ్ర గాయాలతో అక్కడికక్కడే మృతి చెందారు.

స్థానికులు అందించిన సమాచారంతో పోలీసులు తక్షణమే ఘటనా స్థలానికి చేరుకున్నారు. గాయపడిన ఇద్దరిని మెరుగైన చికిత్స కోసం అనంతపురం ఆసుపత్రికి తరలించారు. మృతదేహాలను పోస్టుమార్టం నిమిత్తం తరలించిన పోలీసులు, కేసు నమోదు చేసి దర్యాప్తు చేపట్టారు. అతివేగమే ఈ ప్రమాదానికి ప్రధాన కారణమని పోలీసులు ప్రాథమికంగా నిర్ధారించారు.