ఇకపై ఓన్లీ బ్లాక్‌బస్టర్లే.. సినిమా నిర్మాణంపై బండ్ల గణేశ్ కీలక ప్రకటన!

ప్రముఖ సినీ నిర్మాత బండ్ల గణేశ్ మరోసారి పూర్తిస్థాయిలో చిత్ర నిర్మాణంపై దృష్టి సారించాడు. ఇకపై తన ప్రయాణం కేవలం సినిమాలతోనే ఉంటుందని, బ్లాక్‌బస్టర్ చిత్రాలను నిర్మించడమే తన ఏకైక లక్ష్యమని ఆయన స్పష్టం చేశాడు. మరే ఇతర అంశాలతోనూ తనకు సంబంధం లేదని పేర్కొంటూ శనివారం సోషల్ మీడియా వేదికగా ఒక ఆసక్తికర సందేశాన్ని పోస్ట్ చేశాడు.

"ఇక నా దృష్టి, నా నిర్ణయం, నా ప్రయాణం అంతా సినిమా నిర్మాణంపైనే. ప్రస్తుతం నాకు మరే ఇతర విషయాలతోనూ సంబంధం లేదు. కేవలం బ్లాక్‌బస్టర్ చిత్రాలను నిర్మించాలనే గట్టి సంకల్పంతోనే ముందుకు సాగుతున్నాను. నా శ్రమ, సమయం, శక్తి అంతా ఇక సినిమాకే అంకితం" అని బండ్ల గణేశ్ తన పోస్టులో వెల్లడించాడు. మంచి సినిమాలు నిర్మించి, అఖండ విజయాలను అందుకోవడమే తన తదుపరి లక్ష్యమని ఆయన నొక్కిచెప్పాడు.

గతంలో బండ్ల గణేశ్ తన 'పరమేశ్వర ఆర్ట్ ప్రొడక్షన్స్' బ్యానర్‌పై పవన్ కల్యాణ్‌తో ‘గబ్బర్ సింగ్’, ఎన్టీఆర్‌తో ‘బాద్‌షా’, ‘టెంపర్’ వంటి భారీ విజయాలను అందుకున్నాడు. కొంతకాలంగా రాజకీయ పరమైన వ్యాఖ్యలతో నిరంతరం వార్తల్లో నిలుస్తున్న ఆయన, ఇటీవలే ‘బీజీ బ్లాక్‌బస్టర్స్’ (బండ్ల గణేష్ బ్లాక్‌బస్టర్స్) పేరుతో నూతన నిర్మాణ సంస్థను ప్రారంభించాడు.