ప్రాంతీయ ముద్రలు తగవు.. 'ఇడుపుకాయితం' వివాదంపై నరేశ్

'ఇడుపుకాయితం' సినిమా శీర్షికపై ఇటీవల తలెత్తిన వివాదం నేపథ్యంలో, ప్రాంతీయత ఆధారంగా ముద్రలు వేయడాన్ని ప్రముఖ నటుడు నరేశ్ తప్పుపట్టారు. తెలంగాణ అంటే కేవలం మద్యం, ఆంధ్ర అంటే కేవలం ఆహారం అన్నట్లుగా చిత్రీకరించడం సరికాదని ఆయన పేర్కొన్నారు. ప్రతి ప్రాంతానికి ప్రత్యేకమైన ఆచారాలు, సంస్కృతి ఉంటాయని, ఏ ప్రాంత సంప్రదాయం ఆ ప్రాంతానికి గొప్పదని ఆయన అభిప్రాయపడ్డారు.

ఈ సందర్భంగా నరేశ్ మాట్లాడుతూ.. "మాండలికాలు వేర్వేరుగా ఉండవచ్చు కానీ, మనమంతా మాట్లాడేది తెలుగు భాషే. మనం నిర్మించేవి తెలుగు సినిమాలే" అని స్పష్టం చేశారు. సోషల్ మీడియాలో వచ్చే అసంబద్ధ పోస్టులను, విమర్శలను పట్టించుకోవద్దని ప్రజలకు సూచించారు.

గతంలో తెలంగాణలో తనకు ఎదురైన ఒక అనుభవాన్ని ఆయన ఈ సందర్భంగా గుర్తు చేసుకున్నారు. ఒక అంత్యక్రియల కార్యక్రమంలో కొందరు మద్యం తాగడం చూసి తొలుత తాను ఆశ్చర్యపోయానని, అయితే మృతుడితో ఉన్న అనుబంధాన్ని (అతడు శత్రువైనా, మిత్రుడైనా) మనసు విప్పి మాట్లాడటం తనను ఎంతగానో ఆకట్టుకుందని తెలిపారు.

'ఇడుపుకాయితం' అనే పేరు అర్థం కావడం లేదని, సబ్‌టైటిల్స్ కావాలంటూ కొందరు సామాజిక మాధ్యమాల్లో ఎగతాళి చేయడం, దీనిపై తెలంగాణ కవులు, కళాకారులు తీవ్రంగా స్పందించడం వంటి పరిణామాలు తనను ఎంతగానో బాధించాయని నరేశ్ ఆవేదన వ్యక్తం చేశారు.