ఐసీసీ కీలక ప్రకటన.. 2027 వన్డే ప్రపంచకప్‌కు 12 వేదికలు ఖరారు

24 ఏళ్ల సుదీర్ఘ విరామం తర్వాత పురుషుల క్రికెట్ ప్రపంచకప్‌కు ఆఫ్రికా ఖండం మరోసారి ఆతిథ్యం ఇవ్వనుంది. 2027లో జరగనున్న ఐసీసీ పురుషుల క్రికెట్ ప్రపంచకప్‌ను దక్షిణాఫ్రికా, జింబాబ్వే, నమీబియా దేశాలు సంయుక్తంగా నిర్వహించనున్నాయి. ఈ మెగా టోర్నమెంట్‌కు సంబంధించిన 12 వేదికలను, అధికారిక బ్రాండ్‌ను ఐసీసీ ప్రకటించింది. జొహన్నెస్‌బర్గ్‌లో నిన్న‌ జరిగిన ఓ కార్యక్రమంలో ఈ వివరాలను వెల్లడించారు.

'త్రీ నేషన్స్, వన్ హార్ట్‌బీట్' (మూడు దేశాలు, ఒకే స్పందన) అనే నినాదంతో ఈ టోర్నమెంట్‌ను నిర్వహించనున్నారు. ఆఫ్రికాలోని ఐక్యత, వైవిధ్యం, "నేను ఉన్నానంటే మనం ఉన్నందుకే" అనే అర్థాన్నిచ్చే 'ఉబుంటు' తత్వాన్ని ఈ బ్రాండ్ ప్రతిబింబిస్తుంది. దక్షిణాఫ్రికాలో 8, జింబాబ్వేలో 3, నమీబియాలో ఒక వేదికను ఈ టోర్నీ కోసం ఎంపిక చేశారు.

కొత్త ఫార్మాట్‌లో టోర్నమెంట్ ఈసారి ప్రపంచకప్‌ను సరికొత్త ఫార్మాట్‌లో నిర్వహించనున్నారు. మొత్తం 14 జట్లు పాల్గొనే ఈ టోర్నీలో 57 మ్యాచ్‌లు జరుగుతాయి. టోర్నమెంట్‌లో పోటీతత్వాన్ని పెంచేందుకు మూడు దశల విధానాన్ని ప్రవేశపెట్టారు. 12 నుంచి 14వ ర్యాంకులో ఉన్న జట్ల మధ్య జరిగే 'సూపర్ సిరీస్‌'తో టోర్నీ ప్రారంభమవుతుంది. ఆ తర్వాత 12 జట్లను రెండు గ్రూపులుగా విభజించి గ్రూప్ స్టేజ్ నిర్వహిస్తారు. అనంతరం 'సూపర్ 7' రౌండ్, సెమీ ఫైనల్స్, ఫైనల్ మ్యాచ్‌లు ఉంటాయి.

ఈ ప్రకటనపై ఐసీసీ ఛైర్మన్ జై షా మాట్లాడుతూ.. ఆఫ్రికాలో క్రికెట్ పునరాగమనానికి ఇది ఒక చరిత్రాత్మక ఘట్టమని అభివర్ణించారు. ఐసీసీ సీఈవో సంజోగ్ గుప్తా స్పందిస్తూ.. ఈ ఈవెంట్ ఆఫ్రికా సంస్కృతులు, ప్రజలు, క్రీడపై వారికున్న అభిరుచికి ఒక వేడుకగా నిలుస్తుందని తెలిపారు. సవరించిన ఫార్మాట్ టోర్నీకి మరింత ప్రాధాన్యం, ఉత్కంఠను అందిస్తుందని ఆయన వివరించారు.

వేదికల వివరాలు
దక్షిణాఫ్రికా: వాండరర్స్ (జొహన్నెస్‌బర్గ్), సెంచూరియన్ (ష్వానే), న్యూలాండ్స్ (కేప్ టౌన్), కింగ్స్‌మీడ్ (డర్బన్), సెయింట్ జార్జ్ పార్క్ (గెబెర్హా), మంగాంగ్ ఓవల్ (బ్లూమ్‌ఫోంటెన్), బోలాండ్ పార్క్ (పార్ల్), బఫెలో పార్క్ (కుగోంపో సిటీ). 
జింబాబ్వే: హరారే స్పోర్ట్స్ క్లబ్ (హరారే), క్వీన్స్ స్పోర్ట్స్ క్లబ్ (బులవాయో), ఫాలే మోసీ-ఓ-తున్యా ఇంటర్నేషనల్ క్రికెట్ స్టేడియం (విక్టోరియా ఫాల్స్). 
నమీబియా: నమీబియా క్రికెట్ గ్రౌండ్ (విండ్‌హోక్).

ప్రత్యేక ఆకర్షణగా బ్రాండింగ్ 
టోర్నమెంట్ విజువల్ ఐడెంటిటీని ఆఫ్రికన్ సంప్రదాయ వైర్ బౌల్ స్ఫూర్తితో రూపొందించారు. జింబాబ్వే చిల్లీ, ఆఫ్రికన్ రూట్, నమీబ్ డ్యూన్ వంటి ప్రత్యేక రంగులను ఇందులో ఉపయోగించారు. కాగా, సీనియర్ ఐసీసీ గ్లోబల్ ఈవెంట్‌కు నమీబియా ఆతిథ్యం ఇవ్వడం ఇదే తొలిసారి. చివరిసారిగా 2003లో దక్షిణాఫ్రికా, జింబాబ్వే, కెన్యా సంయుక్తంగా ప్రపంచకప్‌ను నిర్వహించాయి. ఈ కార్యక్రమంలో గ్రేమ్ స్మిత్, మఖాయా ఎన్తిని, హషీమ్ ఆమ్లా, టెంబా బావుమా వంటి మాజీ, ప్రస్తుత ఆటగాళ్లు పాల్గొన్నారు. టికెట్ సమాచారం కోసం అభిమానులు తమ ఆసక్తిని నమోదు చేసుకోవచ్చని ఐసీసీ సూచించింది.