జెర్సీ రంగు మార్పు వెనుక అసలు కారణమిదే.. వివాదానికి తెరదించిన హాకీ ఇండియా

భారత జాతీయ హాకీ జట్ల జెర్సీ రంగును సాంప్రదాయ నీలి రంగు నుంచి కాషాయ రంగుకు మార్చడంపై చెలరేగిన వివాదంపై హాకీ ఇండియా స్పందించింది. ఇది కేవలం సాంకేతిక అవసరాల దృష్ట్యా ఆటగాళ్లు, సహాయక సిబ్బంది సూచనల మేరకే తీసుకున్న నిర్ణయమని స్పష్టం చేసింది. ఈ మార్పు వెనుక ఉన్న అసలు కారణాలను వివరిస్తూ ఒక సుదీర్ఘ ప్రకటన విడుదల చేసింది.

వచ్చే నెల నెదర్లాండ్స్, బెల్జియంలో జరగనున్న 2026 హాకీ ప్రపంచకప్‌లో పురుషుల, మహిళల జట్లు కాషాయ రంగు జెర్సీలతో బరిలోకి దిగుతాయని ఈ నెల‌ 27న హాకీ ఇండియా ప్రకటించిన విషయం తెలిసిందే. ఈ నిర్ణయంపై సోషల్ మీడియాలో తీవ్ర వ్యతిరేకత వ్యక్తమైంది. ముఖ్యంగా భారత హాకీ మాజీ కెప్టెన్ వీరేన్ రస్కిన్హా ఈ మార్పును ప్రశ్నించడంతో వివాదం మరింత పెద్దదైంది.

అసలు కారణం ఇదేనన్న హాకీ ఇండియా
ఈ వివాదంపై స్పందించిన హాకీ ఇండియా.. "అంతర్జాతీయ హాకీ పిచ్‌లు ఇప్పుడు ప్రామాణికంగా నీలి రంగు సింథటిక్ టర్ఫ్‌తో ఉంటున్నాయి. మన ఆటగాళ్లు ధరించే నీలి రంగు జెర్సీ ఈ టర్ఫ్‌లో కలిసిపోతోంది. దీనివల్ల మైదానంలో ఆటగాళ్లకు స్పష్టత లోపించి, ఆటపై ప్రభావం పడుతోంది. ఈ సాంకేతిక సమస్యను అధిగమించేందుకే జెర్సీ రంగు మార్చాలని నిర్ణయించాం" అని తన ప్రకటనలో పేర్కొంది. ఆటగాళ్లు, కోచ్‌లతో విస్తృతంగా చర్చించిన తర్వాతే ఈ నిర్ణయం తీసుకున్నామని స్పష్టం చేసింది.

రస్కిన్హా అభ్యంతరం.. రాజకీయ రంగు
మరోవైపు మాజీ కెప్టెన్ వీరేన్ రస్కిన్హా తన 'ఎక్స్' (ట్విట్టర్) ఖాతాలో.. "భారత హాకీకి నీలి రంగు అనేది గర్వకారణం, గుర్తింపు, వారసత్వం" అని అన్నారు. ఆయన పోస్ట్ వైరల్ కావడంతో చర్చ మొదలైంది. అయితే, తన పోస్టుకు అనవసరంగా రాజకీయ రంగు పులుముతున్నారని ఆయన ఆ తర్వాత ఆవేదన వ్యక్తం చేశారు.

గతంలోనూ మార్చాం..
ఆటగాళ్లు, కోచ్‌లు పసుపు లేదా కాషాయం రంగును ప్రత్యామ్నాయంగా సూచించారని, మన జాతీయ జెండాలో కాషాయం రంగు ధైర్యానికి, త్యాగానికి, జాతీయ గౌరవానికి ప్రతీక కావడంతో దానిని ఖరారు చేశామని హాకీ ఇండియా తెలిపింది. జెర్సీ రంగును మార్చడం ఇదే మొదటిసారి కాదని కూడా గుర్తు చేసింది. 

"2014 ప్రపంచకప్‌లో జట్టు జెర్సీని పసుపు రంగులోకి, 2018 ప్రపంచకప్‌లో స్కై బ్లూ రంగులోకి మార్చాం. కార్యాచరణ అవసరాల మేరకు గతంలోనూ ఇలాంటి మార్పులు జరిగాయి" అని వివరించింది. సాంకేతిక అవసరాలు, జాతీయ భావన రెండింటినీ పరిగణనలోకి తీసుకుని ఈ మార్పు చేసినట్లు హాకీ ఇండియా స్ప‌ష్టం చేసింది.