డిజిటల్ అరెస్టు బందిపోటు దోపిడీతో సమానం: సుప్రీంకోర్టు సంచలన వ్యాఖ్యలు

దేశవ్యాప్తంగా పెచ్చరిల్లుతున్న 'డిజిటల్ అరెస్టు' మోసాల పట్ల సుప్రీంకోర్టు తీవ్ర ఆగ్రహం వ్యక్తం చేసింది. అత్యంత అసాధారణ పరిస్థితుల్లో మినహా, ఇటువంటి కేసుల్లో నిందితులకు బెయిల్ మంజూరు చేయరాదని సర్వోన్నత న్యాయస్థానం స్పష్టం చేసింది. ఈ మేరకు ట్రయల్ కోర్టులతో పాటు హైకోర్టులకు కీలక ఆదేశాలు జారీ చేసింది. సైబర్ నేరగాళ్ల ఉచ్చులో చిక్కి, ముఖ్యంగా సీనియర్ సిటిజన్లు తమ జీవితకాల కష్టార్జితాన్ని కోల్పోతుండటంపై ధర్మాసనం తీవ్ర ఆవేదన వ్యక్తం చేసింది.

ఈ తరహా మోసాలు బందిపోటు దోపిడీలతో సమానమని సుప్రీంకోర్టు ఘాటుగా వ్యాఖ్యానించింది. అందువల్ల డిజిటల్ అరెస్టు కేసులను సాధారణ నేరాలుగా పరిగణించకుండా, 'వ్యవస్థీకృత నేరాల నియంత్రణ చట్టం' (Organised Crime Control Act) కింద దర్యాప్తు జరపాలని పోలీసు యంత్రాంగాన్ని ఆదేశించింది. ఇలాంటి తీవ్రమైన నేరాల్లో దర్యాప్తు సరళి కూడా అదే స్థాయిలో పకడ్బందీగా ఉండాలని అభిప్రాయపడింది.

ప్రధాన నిందితుడికి బ్యాంకు ఖాతా తెరిచేందుకు కేవలం సహకరించాను తప్ప, తనకు నేరంతో ప్రత్యక్ష ప్రమేయం లేదని పేర్కొంటూ ఓ వ్యక్తి బెయిల్ కోసం సుప్రీంకోర్టును ఆశ్రయించాడు. అయితే అతని వాదనలను తోసిపుచ్చిన ధర్మాసనం, బెయిల్ పిటిషన్‌ను నిర్ద్వంద్వంగా తిరస్కరించింది. ఈ పరిణామాలను గమనిస్తే, డిజిటల్ మోసాల పట్ల న్యాయవ్యవస్థ ఎంత కఠినంగా వ్యవహరించబోతోందో స్పష్టమవుతోంది.