కోయంబత్తూరులో రామ్ చరణ్‌కు విజయవంతంగా ముగిసిన శస్త్రచికిత్స

టాలీవుడ్ గ్లోబల్ స్టార్ రామ్ చరణ్ కుడి చేతికి సోమవారం విజయవంతంగా శస్త్రచికిత్స పూర్తయింది. తమిళనాడులోని కోయంబత్తూరులో గల గంగ ఆసుపత్రిలో వైద్యులు ఈ చికిత్సను నిర్వహించారు. 'పెద్ది' చిత్రం షూటింగ్ సమయంలో ఆయన మణికట్టుకు గాయం కావడంతో వైద్యులు ఈ శస్త్రచికిత్స చేశారు. ప్రస్తుతం ఆయన ఆరోగ్యం నిలకడగా ఉందని, త్వరగా కోలుకుంటున్నారని వైద్య వర్గాలు వెల్లడించాయి.

గంగ ఆసుపత్రి చైర్మన్, ప్రముఖ ఆర్థోపెడిక్ సర్జన్ డాక్టర్ ఎస్. రాజశేఖరన్ పర్యవేక్షణలో ఈ శస్త్రచికిత్స జరిగింది. గాయం తీవ్రత దృష్ట్యా, అమెరికాలోని మయామికి చెందిన అంతర్జాతీయ ప్రసిద్ధి గాంచిన హ్యాండ్, రిస్ట్ స్పెషలిస్ట్ డాక్టర్ అలెజాండ్రో బడియాను ప్రత్యేకంగా కోయంబత్తూరుకు రప్పించారు. డాక్టర్ రాజశేఖరన్, డాక్టర్ బడియా, డాక్టర్ ప్రవీణ్ భరద్వాజ్‌ నేతృత్వంలోని నిపుణులైన వైద్యుల బృందం ఈ సర్జరీని విజయవంతంగా పూర్తి చేసింది. గతంలో చిరంజీవికి ఎదురైన వెన్నెముక సమస్యకు కూడా డాక్టర్ రాజశేఖరన్ చికిత్స అందించారు. 

ప్రస్తుతం రామ్ చరణ్ వేగంగా కోలుకుంటున్నారని, ఆయన ఆరోగ్య పరిస్థితి అత్యంత సంతృప్తికరంగా ఉందని వైద్యులు తెలిపారు. మరో నాలుగు రోజుల పాటు ఆసుపత్రిలోనే వైద్యుల పర్యవేక్షణలో విశ్రాంతి తీసుకున్న అనంతరం ఆయన హైదరాబాద్‌కు తిరిగి రానున్నారు. దర్శకుడు బుచ్చిబాబు సానా తెరకెక్కిస్తున్న 'పెద్ది' చిత్రంలోని యాక్షన్, రెజ్లింగ్ సన్నివేశాల చిత్రీకరణ సమయంలో రామ్ చరణ్‌కు ఈ మణికట్టు గాయమైంది.