గ్లాస్గోలో రజతంతో మెరిసిన రాజా ముత్తుపాండి.. తమిళనాడు అథ్లెట్‌కు సీఎం విజయ్ భారీ నజరానా

స్కాట్లాండ్‌లోని గ్లాస్గోలో జరుగుతున్న కామన్వెల్త్ క్రీడలు 2026లో రజత పతకం సాధించిన తమిళనాడు వెయిట్‌లిఫ్టర్ రాజా ముత్తుపాండికి రాష్ట్ర ప్రభుత్వం భారీ నజరానా ప్రకటించింది. పురుషుల 65 కేజీల విభాగంలో అద్భుత ప్రదర్శన కనబరిచిన రాజాకు రూ. 30 లక్షల నగదు ప్రోత్సాహకాన్ని అందిస్తున్నట్లు ముఖ్యమంత్రి విజయ్ ప్రకటించారు. ఈ విజయం రాష్ట్రంలోని యువ క్రీడాకారులకు ఎంతో స్ఫూర్తినిస్తుందని ఆయన విశ్వాసం వ్యక్తం చేశారు.

ఈ సందర్భంగా రాజా ముత్తుపాండికి సీఎం విజయ్ సోషల్ మీడియా వేదికగా అభినందనలు తెలిపారు. అంతర్జాతీయ వేదికపై రాజా కనబరిచిన పట్టుదల, రికార్డు స్థాయి ప్రదర్శన తమిళనాడుకు, యావత్ దేశానికి గర్వకారణమని కొనియాడారు. రాష్ట్ర ప్రభుత్వం అందించే అత్యున్నత క్రీడా ప్రోత్సాహకాల్లో ఒకటిగా ఈ నగదు పురస్కారాన్ని అందిస్తున్నట్లు తెలిపారు. రాజా విజయం స్ఫూర్తితో రాష్ట్రంలోని వర్ధమాన క్రీడాకారులు క్రీడల్లో రాణించి, తమిళనాడుకు మరింత గుర్తింపు తీసుకురావాలని ఆకాంక్షించారు.

ఈ పోటీలో రాజా ముత్తుపాండి మొత్తం 286 కిలోల బరువును ఎత్తి రెండో స్థానంలో నిలిచాడు. స్నాచ్ విభాగంలో తొలి ప్రయత్నంలో 125 కేజీలు, రెండో ప్రయత్నంలో 126 కేజీలు విజయవంతంగా ఎత్తాడు. ఇక క్లీన్ అండ్ జర్క్ విభాగంలో 158 కేజీలు, 160 కేజీల బరువును సునాయాసంగా ఎత్తి రజత పతకాన్ని ఖాయం చేసుకున్నాడు.

ఈ విజయంపై సీఎం విజయ్ స్పందిస్తూ.. "గ్లాస్గో కామన్వెల్త్ ఛాంపియన్‌షిప్‌లో పురుషుల 65 కేజీల వెయిట్‌లిఫ్టింగ్ విభాగంలో రజత పతకం గెలిచిన రాజా ముత్తుపాండికి నా హృదయపూర్వక అభినందనలు. అతడి విజయం తమిళనాడుకు ఎంతో గర్వకారణం. ఈ విజయం మన యువతకు స్ఫూర్తినివ్వాలని, తమిళనాడుకు, దేశానికి మరిన్ని విజయాలు సాధించిపెట్టాలని ఆకాంక్షిస్తున్నాను" అని పేర్కొన్నారు.

రాజా ముత్తుపాండికి అంతర్జాతీయ పోటీల్లో పతకాలు గెలవడం కొత్తేమీ కాదు. 2025లో జరిగిన కామన్వెల్త్ ఛాంపియన్‌షిప్‌లోనూ రజతం సాధించాడు. అదే ఏడాది నార్వేలో జరిగిన ప్రపంచ ఛాంపియన్‌షిప్‌లో 65 కేజీల విభాగంలో 9వ స్థానంలో నిలిచి, తన వ్యక్తిగత అత్యుత్తమ ప్రదర్శనగా 299 కేజీల (స్నాచ్ 130 కేజీలు + క్లీన్ అండ్ జర్క్ 169 కేజీలు) బరువును ఎత్తాడు.