ట్రిప్‌లో మీ లగేజీ మోసే రోబో.. కొండలు, గుట్టలు కూడా ఎక్కేస్తుంది!

మీరు తర్వాతి ట్రిప్ కి ఒక రోబోను వెంట తీసుకెళ్తే ఎలా ఉంటుంది? ఇది సైన్స్ ఫిక్షన్ సినిమాలోని దృశ్యంలా అనిపించినా, క్రమంగా నిజమవుతోంది. చైనాకు చెందిన ఓ కొత్త రోబో డాగ్ ఇప్పుడు ఆన్‌లైన్‌లో అందరి దృష్టిని ఆకర్షిస్తోంది. రాళ్లురప్పల దారుల్లో నడవడం, నిటారుగా ఉండే కొండలు ఎక్కడం, లగేజీ మోయడం, మనుషులను అనుసరించడం వంటి పనులతో ఈ రోబో అబ్బురపరుస్తోంది.

ప్రముఖ పారిశ్రామికవేత్త హర్ష్ గోయెంకా ఇటీవల ఈ రోబోకు సంబంధించిన వీడియోను సోషల్ మీడియా ప్లాట్‌ఫామ్ 'ఎక్స్‌'లో పంచుకోవడంతో ఇది మరింత వైరల్ అయింది. ఆ వీడియోలో ఈ రోబో డాగ్ ఎలాంటి ఇబ్బంది లేకుండా కొండ ప్రాంతంలో సునాయాసంగా కిందికి దిగుతూ కనిపించింది. 

"చైనా కంపెనీ యూనిట్రీ తయారు చేసిన 'ఆల్-టెరైన్' రోబో డాగ్ ఇది. కొండలు ఎక్కగలదు, కఠినమైన భూభాగాలపై వేగంగా పరుగెత్తగలదు, మీ ప్రయాణంలో తోడుగా ఉండగలదు" అంటూ గోయెంకా తన పోస్ట్‌లో పేర్కొన్నారు. ఈ పోస్ట్ తర్వాత భవిష్యత్తులో ట్రెక్కింగ్, అవుట్‌డోర్ ప్రయాణాల్లో ఇలాంటి రోబోలు సాధారణం అవుతాయా అనే చర్చ మొదలైంది.

యూనిట్రీ ఏఎస్2: ఇది బొమ్మ కాదు.. అంతకుమించి
ఈ రోబో పేరు 'యూనిట్రీ ఏఎస్2' (Unitree As2). దీనిని చైనాకు చెందిన యూనిట్రీ రోబోటిక్స్ సంస్థ అభివృద్ధి చేసింది. ఇది కేవలం బొమ్మ లేదా పెంపుడు జంతువు కాదని, రెస్క్యూ ఆపరేషన్లు, పారిశ్రామిక పనులు, అవుట్‌డోర్ అన్వేషణ, మనుషులకు తోడుగా ఉండటం వంటి ఆచరణాత్మక పనుల కోసం దీనిని రూపొందించినట్లు కంపెనీ చెబుతోంది. ఇందులో యూనిట్రీ ఏఎస్2-డబ్ల్యూ (Unitree As2-W) అనే మరో వెర్షన్ కూడా ఉంది. దీనికి కాళ్లతో పాటు పెద్ద చక్రాలు కూడా ఉంటాయి. ఈ చక్రాల సహాయంతో ఇది కఠినమైన భూభాగాల్లో సైతం వేగంగా ప్రయాణించగలదు.

కఠినమైన దారులకే ప్రత్యేకం
సాధారణ యంత్రాలు వెళ్లలేని ప్రదేశాల కోసమే ఈ రోబోను ప్రత్యేకంగా తయారుచేశారు. రాళ్లున్న ట్రెక్కింగ్ దారులు, వానకు తడిసిన బురద నేలలు, నిటారుగా ఉండే పర్వత ప్రాంతాలు వంటి చోట్ల ఇది సులభంగా ముందుకు సాగుతుంది. ఏఎస్2 మోడల్ 40 డిగ్రీల వాలు ఉన్న ప్రదేశాలను ఎక్కగలదు, 50 సెం.మీ ఎత్తైన అడ్డంకులను దాటగలదు. చక్రాలు ఉన్న ఏఎస్2-డబ్ల్యూ వెర్షన్ అయితే 45 డిగ్రీల వాలు, 80 సెం.మీ ఎత్తైన అడ్డంకులను కూడా అధిగమించగలదు.

బ్యాక్‌ప్యాక్‌ను కూడా మోస్తుంది
ప్రయాణికులకు అత్యంత ఆకర్షణీయమైన ఫీచర్ ఇదే. గంటల తరబడి బరువైన బ్యాక్‌ప్యాక్‌ను భుజాలపై మోయకుండా ట్రెక్కింగ్ చేసే అవకాశాన్ని ఇది కల్పిస్తుంది. ఈ రోబో దాదాపు 15 నుంచి 16 కిలోల బరువును మోస్తూ మనిషి పక్కన నడవగలదు. కెమెరా పరికరాలు, క్యాంపింగ్ సామాగ్రి, ఆహారం లేదా దుస్తులు వంటివి మోయడానికి దీనిని ఉపయోగించుకోవచ్చు. దీనికి అమర్చిన 'ఐఎస్ఎస్ 3.0 ఇంటెలిజెంట్ ఫాలో సిస్టమ్' కార‌ణంగా ఇది మనిషిని కచ్చితత్వంతో అనుసరిస్తుంది.

దుమ్ము, నీటి నుంచి రక్షణ కోసం దీనికి IP54 రేటింగ్ ఇచ్చారు. అంటే.. తేలికపాటి వానలో, దుమ్ము వాతావరణంలోనూ ఇది పనిచేస్తుంది. చూడటానికి చిన్నగా ఉన్నా, దీని వేగం ఆశ్చర్యపరుస్తుంది. ఏఎస్2 గంటకు 5 మీటర్ల వేగంతో ఏఎస్2-డబ్ల్యూ 6 మీటర్ల వేగంతో ప్రయాణిస్తాయి. హర్ష్ గోయెంకా వంటి వారు దీనిని ప్రయాణాలకు అద్భుతమైన ఆవిష్కరణగా చూస్తున్నప్పటికీ, రెస్క్యూ ఆపరేషన్లు, పారిశ్రామిక తనిఖీలు, భద్రత, పరిశోధన వంటి కీలక రంగాల్లో దీని పాత్ర చాలా పెద్దదని యూనిట్రీ సంస్థ పేర్కొంది.