రేపటి నుంచి 'ఇంటింటికి తెలుగుదేశం': పల్లా శ్రీనివాసరావు

ఆంధ్రప్రదేశ్‌లో ఎన్డీయే కూటమి ప్రభుత్వం ఏర్పడి రెండేళ్లు పూర్తవుతున్న సందర్భంగా, ప్రభుత్వ విజయాలను ప్రజల్లోకి విస్తృతంగా తీసుకెళ్లేందుకు తెలుగుదేశం పార్టీ సిద్ధమైంది. టీడీపీ జాతీయ అధ్యక్షుడు చంద్రబాబు సారథ్యంలో 'ఇంటింటికి తెలుగుదేశం' పేరుతో భారీ కార్యక్రమానికి శ్రీకారం చుట్టనున్నట్లు పార్టీ రాష్ట్ర అధ్యక్షుడు పల్లా శ్రీనివాసరావు ప్రకటించారు. రేపు సోమవారం (జులై 27) ప్రారంభమయ్యే ఈ కార్యక్రమం రాష్ట్రవ్యాప్తంగా 45 రోజుల పాటు నిరంతరాయంగా కొనసాగుతుందని ఆయన తెలిపారు.

ఈ సందర్భంగా పల్లా శ్రీనివాసరావు మాట్లాడుతూ, "ఎన్డీయే ప్రభుత్వ రెండేళ్ల సుపరిపాలనలో సాధించిన అభివృద్ధి, సంక్షేమ ఫలాలను ప్రతి గడపకూ వివరించడమే ఈ కార్యక్రమ ముఖ్య ఉద్దేశం. గత ఏడాది 'సుపరిపాలన తొలి ఏడాది' పేరుతో నిర్వహించిన కార్యక్రమాన్ని విజయవంతం చేసినట్లే, ఈసారి కూడా పార్టీ నాయకులు, కార్యకర్తలు ఉత్సాహంగా పాల్గొనాలి" అని పిలుపునిచ్చారు. ఎన్నికల్లో ఇచ్చిన సూపర్-6 హామీల అమలు తీరును, వాటి ద్వారా మహిళలు, రైతులు, యువత, విద్యార్థులు పొందిన లబ్ధిని ప్రజలకు స్పష్టంగా తెలియజేయాలని సూచించారు.

"గత ప్రభుత్వ విధ్వంసక పాలనకు, ప్రస్తుత ఎన్డీయే ప్రభుత్వ అభివృద్ధి పాలనకు మధ్య ఉన్న వ్యత్యాసాన్ని ప్రజలకు అర్థమయ్యేలా వివరించాలి. ఒకే రాజధాని, అభివృద్ధి వికేంద్రీకరణ విధానంతో పాటు ఉత్తరాంధ్ర, రాయలసీమ ప్రాంతాల్లో జరుగుతున్న అభివృద్ధి పనులను ప్రజల దృష్టికి తీసుకెళ్లాలి" అని పల్లా పేర్కొన్నారు. కేవలం ప్రభుత్వ విజయాలు చెప్పడమే కాకుండా, ప్రజల నుంచి సమస్యలు, సూచనలను స్వీకరించి, వాటి పరిష్కారానికి పార్టీ, ప్రభుత్వం తరఫున కృషి చేయాలని దిశానిర్దేశం చేశారు. కేంద్ర ప్రభుత్వం, మిత్రపక్షాల సహకారంతో రాష్ట్రం సాధిస్తున్న ప్రగతిని ప్రజల్లోకి బలంగా తీసుకెళ్లాలని పార్టీ శ్రేణులను ఆయన కోరారు.