కేంద్రమంత్రి రాజీనామా.. అన్నా హజారే కీలక వ్యాఖ్యలు

ప్రముఖ సామాజిక కార్యకర్త, గాంధేయవాది అన్నా హజారే దేశంలో నిరసనలు, ప్రజాస్వామ్య విలువలపై కీలక వ్యాఖ్యలు చేశారు. కేంద్ర విద్యాశాఖ మంత్రి ధర్మేంద్ర ప్రధాన్ రాజీనామాతో 'కాక్రోచ్ జనతా పార్టీ' (సీజేపీ) తన నిరసనను విరమించుకున్న నేపథ్యంలో ఆయన స్పందించారు. సమస్యలను బలప్రయోగంతో కాకుండా చర్చలు, ప్రజాస్వామ్య పద్ధతుల ద్వారా పరిష్కరించుకోవాలని ఆయన స్పష్టం చేశారు. ఇది ప్రజాస్వామ్యమని, నియంతృత్వం కాదని గుర్తుంచుకోవాలని హితవు పలికారు.

అహిల్యానగర్‌లో విలేకరులతో మాట్లాడిన 89 ఏళ్ల హజారే.. ప్రజా సమస్యల పరిష్కారానికి ప్రభుత్వాలు ఏకపక్ష నిర్ణయాలు తీసుకోకూడదని అన్నారు. "ఇది ప్రజాస్వామ్యం, నియంతృత్వం కాదు. ప్రతి ఒక్కరూ ప్రజాస్వామ్య మార్గాన్నే అనుసరించాలి" అని ఆయన పేర్కొన్నారు. ప్రజలు, ప్రభుత్వాలు ఘర్షణ వైఖరిని వీడి, చర్చల మార్గాన్ని ఎంచుకున్నప్పుడే వ్యవస్థలో అర్థవంతమైన, శాశ్వతమైన మార్పు సాధ్యమవుతుందని అన్నారు.

దేశవ్యాప్తంగా పరీక్షా విధానాలపై విశ్వాసాన్ని దెబ్బతీసిన పేపర్ లీకేజీల వ్యవహారంపై సీజేపీ వారాల తరబడి నిరసన చేపట్టిన విషయం తెలిసిందే. ఈ ఆందోళనల నేపథ్యంలో నిన్న‌ కేంద్ర విద్యాశాఖ మంత్రి ధర్మేంద్ర ప్రధాన్ తన పదవికి రాజీనామా చేశారు. దీంతో సీజేపీ తమ ఆందోళనను విరమించుకుంది. ఈ పరిణామం జరిగిన మరుసటి రోజే అన్నా హజారే స్పందించడం ప్రాధాన్యం సంతరించుకుంది.