నీట్ పేపర్ లీకేజీలు: కేంద్రానికి సుప్రీంకోర్టు కీలక ఆదేశాలు

దేశవ్యాప్తంగా వైద్య విద్య ప్రవేశాల కోసం నిర్వహించే నీట్ (NEET) పరీక్షలో ప్రశ్నపత్రాల లీకేజీని నివారించేందుకు కేంద్ర ప్రభుత్వం చేపడుతున్న చర్యలను నిశితంగా పర్యవేక్షిస్తామని సుప్రీంకోర్టు స్పష్టం చేసింది. విద్యార్థుల భవిష్యత్తుకు ఎలాంటి విఘాతం కలగనివ్వబోమని శుక్రవారం నాటి విచారణ సందర్భంగా ధర్మాసనం కీలక వ్యాఖ్యలు చేసింది.

గతంలో కేవలం తాత్కాలిక చర్యలకే పరిమితం కావడం వల్లే సమస్యలు పునరావృతమవుతున్నాయని జస్టిస్ పి.ఎస్. నరసింహ, జస్టిస్ అలోక్ అరాధేలతో కూడిన ధర్మాసనం అభిప్రాయపడింది. పరీక్షల నిర్వహణను శాశ్వత ప్రాతిపదికన క్రమబద్ధీకరించాల్సిన అవసరం ఉందని నొక్కి చెప్పింది. నీట్ నిర్వహణలో పారదర్శకతను పెంచేందుకు నియమించిన రాధాకృష్ణన్ కమిటీ సిఫారసుల అమలుపై చేపట్టిన చర్యలను వివరిస్తూ సమగ్ర అఫిడవిట్ దాఖలు చేయాలని కేంద్ర ప్రభుత్వాన్ని, నేషనల్ టెస్టింగ్ ఏజెన్సీని (NTA) సర్వోన్నత న్యాయస్థానం ఆదేశించింది.

కేంద్ర ప్రభుత్వం తరఫున హాజరైన సొలిసిటర్ జనరల్ తుషార్ మెహతా వాదనలు వినిపిస్తూ.. రాధాకృష్ణన్ కమిటీ సిఫారసుల కంటే లోతైన సంస్కరణలను అమలు చేస్తున్నామని కోర్టుకు వివరించారు. విద్యార్థుల భవిష్యత్తుకు ఎట్టి పరిస్థితుల్లోనూ భంగం కలగనివ్వబోమని ఈ సందర్భంగా ఆయన హామీ ఇచ్చారు. ఈ అంశంపై సమగ్ర నివేదికను సమర్పించేందుకు తమకు కొంత సమయం కావాలని కోర్టును అభ్యర్థించారు.

సొలిసిటర్ జనరల్ అభ్యర్థనను పరిగణనలోకి తీసుకున్న ధర్మాసనం, తదుపరి విచారణను ఆగస్టు 3వ తేదీకి వాయిదా వేసింది. నీట్ నిర్వహణలో వ్యవస్థాగత సంస్కరణలు చేపట్టాలని కోరుతూ ఫెడరేషన్ ఆఫ్ ఆల్ ఇండియా మెడికల్ అసోసియేషన్ (FAIMA) సహా పలువురు దాఖలు చేసిన పిటిషన్లపై కోర్టు ఈ విచారణ చేపట్టింది.