గుంతకల్లు-బళ్లారి మధ్య 3వ, 4వ రైల్వే లైన్లు.. కేంద్రం గ్రీన్ సిగ్నల్

ఆంధ్రప్రదేశ్‌లోని కీలకమైన రైల్వే జంక్షన్ గుంతకల్లు మీదుగా రవాణా వ్యవస్థను బలోపేతం చేసే దిశగా కేంద్ర ప్రభుత్వం కీలక నిర్ణయం తీసుకుంది. గుంతకల్లు-బళ్లారి సెక్షన్‌లో మూడో, నాలుగో రైల్వే లైన్ల నిర్మాణానికి ఆమోదం తెలిపింది. ప్రధానమంత్రి నరేంద్ర మోదీ అధ్యక్షతన శుక్రవారం జరిగిన ఆర్థిక వ్యవహారాల కేబినెట్ కమిటీ (సీసీఈఏ) ఈ ప్రాజెక్టుకు పచ్చజెండా ఊపింది. ఈ విస్తరణ పనుల కోసం మొత్తం రూ.1,264 కోట్ల పెట్టుబడి పెట్టనున్నట్టు కేంద్రం అధికారికంగా ప్రకటించింది.

ఈ మల్టీట్రాక్ ప్రాజెక్టు ఆంధ్రప్రదేశ్, కర్ణాటక రాష్ట్రాల్లోని మూడు జిల్లాల గుండా వెళుతుంది. దీని ద్వారా భారతీయ రైల్వే నెట్‌వర్క్ సుమారు 46 కిలోమీటర్ల మేర విస్తరించనుంది. 2028-29 నాటికి ఈ ప్రాజెక్టును పూర్తి చేయాలని లక్ష్యంగా నిర్దేశించారు. ఈ కొత్త లైన్ల నిర్మాణం వల్ల దాదాపు 99 గ్రామాలకు మెరుగైన కనెక్టివిటీ అందుబాటులోకి వస్తుంది. ఈ ప్రాంతాల్లోని సుమారు 7 లక్షల మంది ప్రజలకు ఇది ప్రయోజనం చేకూరుస్తుంది. అంతేకాకుండా, బళ్లారి కోట, శ్రీ కుమార స్వామి ఆలయం వంటి పర్యాటక ప్రాంతాలకు రైలు సౌకర్యం మరింత మెరుగుపడుతుంది.

గుంతకల్లు-బళ్లారి మార్గం ఇనుప ఖనిజం, డోలమైట్, సున్నపురాయి, ఉక్కు, బొగ్గు, ఎరువులు, ఆహార ధాన్యాలు వంటి నిత్యావసర సరుకుల రవాణాకు అత్యంత కీలకమైనది. ఈ లైన్ల సామర్థ్యం పెంచడం ద్వారా ఏటా అదనంగా 16.22 మిలియన్ టన్నుల సరుకు రవాణా చేసేందుకు వీలవుతుందని అంచనా వేస్తున్నారు. దీనివల్ల ఈ మార్గంలో రద్దీ తగ్గి, రైళ్ల రాకపోకలు వేగవంతం అవుతాయి.

పర్యావరణ హితమైన రవాణా విధానంగా రైల్వే నెట్‌వర్క్ విస్తరణ దోహదపడుతుందని కేంద్రం పేర్కొంది. ఈ ప్రాజెక్టు ద్వారా దేశ చమురు దిగుమతులు ఏటా 1.32 కోట్ల లీటర్ల మేర తగ్గుతాయని, కార్బన్ డై ఆక్సైడ్ ఉద్గారాలు 6.67 కోట్ల కిలోలు తగ్గుతాయని తెలిపింది. ఇది 0.27 కోట్ల చెట్లను నాటడంతో సమానమని వివరించింది. పీఎం-గతి శక్తి నేషనల్ మాస్టర్ ప్లాన్‌లో భాగంగా చేపట్టిన ఈ ప్రాజెక్టు, ప్రజలు, వస్తువులు, సేవల కదలికలకు అతుకులు లేని కనెక్టివిటీని అందిస్తుందని ప్రభుత్వం ఒక ప్రకటనలో వెల్లడించింది. ఈ ప్రాజెక్టు ద్వారా ఈ ప్రాంతంలో సమగ్ర అభివృద్ధి జరిగి, ఉపాధి అవకాశాలు పెరిగి ప్రజలు 'ఆత్మనిర్భర్'గా మారతారని కేంద్రం ఆశాభావం వ్యక్తం చేసింది.