ఒక రేడియో నాటకం.. అమెరికాను వణికించిన ఆ రాత్రి!

కొన్ని సంఘటనలు జరిగినప్పుడు సాధారణంగా అనిపిస్తాయి. కానీ కాలం గడిచేకొద్దీ అవే చరిత్రలో గొప్ప పాఠాలుగా నిలుస్తాయి. దాదాపు 90 ఏళ్ల క్రితం అమెరికాలో ప్రసారమైన ఒక రేడియో నాటకం కూడా అలాంటిదే. అది కేవలం వినోద కార్యక్రమమే అయినప్పటికీ, లక్షలాది మందిని నిజంగానే దేశంపై గ్రహాంతరవాసుల దాడి జరిగిందని నమ్మించింది. అప్పట్లో జరిగిన ఈ ఘటన.. నేడు సోషల్‌ మీడియాలో వైరల్‌ అవుతున్న ఫేక్‌ న్యూస్‌, తప్పుడు ప్రచారం ఎంత ప్రమాదకరమో ముందుగానే చూపించిన ఉదాహరణగా నిలిచింది.

1938 అక్టోబర్‌ 30న అమెరికాలో ‘ది వార్‌ ఆఫ్‌ ది వరల్డ్స్‌’ అనే సైన్స్‌ ఫిక్షన్‌ కథను రేడియో నాటకంగా ప్రసారం చేశారు. యువ దర్శకుడు ఆర్సన్‌ వెల్స్‌ దీనిని సాధారణ నాటకంలా కాకుండా, మధ్య మధ్యలో అత్యవసర వార్తా బులెటిన్లు వస్తున్నట్లుగా రూపొందించారు. ఆ రాత్రి... న్యూజెర్సీలో ఆకాశం నుంచి వింత వస్తువులు పడుతున్నాయని, అంగారకగ్రహవాసులు దాడి చేస్తున్నారని రిపోర్టర్లు ప్రత్యక్ష ప్రసారం చేస్తున్నట్టుగా వినిపించారు. కార్యక్రమం ప్రారంభంలో ఇది నాటకమని చెప్పినా, మధ్యలో రేడియో ఆన్‌ చేసిన చాలామందికి ఆ విషయం తెలియకపోవడంతో ప్రసారాన్ని నిజమైన వార్తగా నమ్మేశారు.

ఆ రోజుల్లో రేడియో ప్రజలకు అత్యంత విశ్వసనీయమైన సమాచార వేదిక. ఎన్నికల ఫలితాల నుంచి యుద్ధ వార్తల వరకు అన్నీ రేడియో ద్వారానే తెలిసేవి. అందుకే అత్యవసర వార్తల తరహాలో వచ్చిన ఈ ప్రసారం చాలామందిలో భయాన్ని రేకెత్తించింది. కొందరు పోలీసులకు, పత్రిక కార్యాలయాలకు ఫోన్లు చేసి నిజమేనా అని అడిగారు. మరికొందరు ఇళ్ల నుంచి బయటకు వెళ్లేందుకు సిద్ధమయ్యారు. అయితే తర్వాత జరిగిన పరిశోధనల్లో దేశమంతా భయాందోళనలకు గురైందన్న ప్రచారం కొంత అతిశయోక్తేనని చరిత్రకారులు చెప్పారు. గందరగోళానికి గురైన వారి సంఖ్య పరిమితంగానే ఉన్నప్పటికీ, ఈ ఘటన మాత్రం ప్రపంచ దృష్టిని ఆకర్షించింది.

ఈ సంఘటన తర్వాత అమెరికాలో ప్రసార మాధ్యమాల నిబంధనల్లో మార్పులు వచ్చాయి. వాస్తవ వార్తల్లా కనిపించే కల్పిత కార్యక్రమాల విషయంలో మరింత జాగ్రత్తలు తీసుకోవడం ప్రారంభించారు. ఆర్సన్‌ వెల్స్‌ కూడా తర్వాత మాట్లాడుతూ, కొత్త సమాచార మాధ్యమాలను ప్రజలు ఎంత సులభంగా నమ్మేస్తారో ఈ ఘటన బయటపెట్టిందని చెప్పారు.

నేడు సోషల్‌ మీడియా, ఇంటర్నెట్‌ ద్వారా ఫేక్‌ న్యూస్‌ వేగంగా వ్యాపిస్తున్న సమయంలో 1938 రేడియో ప్రసారం మరోసారి గుర్తుకొస్తోంది. ఏ సమాచారం వచ్చినా వెంటనే నమ్మకుండా, అధికారిక వనరులతో ధ్రువీకరించుకోవాల్సిన అవసరాన్ని ఈ ఘటన ఇప్పటికీ గుర్తు చేస్తూనే ఉంది.