కెరీర్ ఆరంభంలో ఇలాంటి ఇన్నింగ్స్‌లు ఆత్మవిశ్వాసాన్ని పెంచుతాయి: వైభవ్ సూర్యవంశీ

భారత క్రికెట్‌లో వైభవ్ సూర్యవంశీ సరికొత్త చరిత్ర సృష్టించాడు. కేవలం 15 ఏళ్ల వయసులోనే అంతర్జాతీయ క్రికెట్‌లో అడుగుపెట్టిన ఈ యువ సంచలనం తన అద్భుతమైన బ్యాటింగ్‌తో ప్రపంచ రికార్డును నెలకొల్పాడు. జింబాబ్వేతో జరిగిన తొలి టీ20 మ్యాచ్‌లో మెరుపు హాఫ్ సెంచరీ సాధించి, అంతర్జాతీయ క్రికెట్‌లో ఈ ఘనత సాధించిన అత్యంత పిన్న వయస్కుడిగా నిలిచాడు. ఈ మ్యాచ్‌లో ఓపెనర్‌గా బరిలోకి దిగిన వైభవ్, కేవలం 19 బంతుల్లోనే 50 పరుగులు పూర్తి చేసి తన తొలి అంతర్జాతీయ అర్ధశతకాన్ని నమోదు చేశాడు.

ఈ అద్భుత ఇన్నింగ్స్‌తో వైభవ్ సూర్యవంశీ దిగ్గజ క్రికెటర్ సచిన్ టెండూల్కర్ పేరిట ఉన్న 37 ఏళ్ల రికార్డును అధిగమించాడు. 1989లో పాకిస్థాన్‌పై సచిన్ తన 16 ఏళ్ల 213 రోజుల వయసులో టెస్టుల్లో హాఫ్ సెంచరీ సాధించగా, ఇప్పుడు వైభవ్ అంతకంటే తక్కువ వయసులోనే ఈ మైలురాయిని అందుకున్నాడు. అంతర్జాతీయ క్రికెట్‌లో పిన్న వయసులో హాఫ్ సెంచరీ చేసిన రికార్డు గతంలో నేపాల్ ఆటగాడు కుశాల్ మల్లా పేరిట ఉండేది. 2020లో అతను 15 ఏళ్ల 340 రోజుల వయసులో వన్డేల్లో ఈ ఫీట్ సాధించగా, ఇప్పుడు వైభవ్ ఆ రికార్డును బద్దలు కొట్టాడు.

మ్యాచ్ అనంతరం 'బీసీసీఐ.టీవీ'తో మాట్లాడుతూ వైభవ్ తన ఆనందాన్ని పంచుకున్నాడు. "కెరీర్ ప్రారంభ దశలోనే ఇలాంటి ఇన్నింగ్స్‌లు ఆడితే, రాబోయే మ్యాచ్‌లకు ఆత్మవిశ్వాసం బాగా పెరుగుతుంది. ఈ రోజు నేను నా జోన్‌లో ఉన్నట్లు అనిపించింది. నా బలాన్ని నమ్ముకుని ఆడాను. ఈ హాఫ్ సెంచరీని నా కుటుంబానికి, కోచ్‌లకు, నా ప్రయాణంలో కష్టసుఖాల్లో అండగా నిలిచిన ప్రతి ఒక్కరికీ అంకితమిస్తున్నాను" అని చెప్పాడు.

అర్ధశతకం సాధించాక, వైభవ్ తన రెండు చేతులతో గాల్లో 'A' ఆకారాన్ని ప్రదర్శించాడు. దీని వెనుక ఉన్న కారణాన్ని వివరిస్తూ, తన తల్లి 'ఆర్తి' పేరులోని మొదటి అక్షరానికి గుర్తుగా ఆ సెలబ్రేషన్ చేసుకున్నానని స్పష్టం చేశాడు. అలాగే మరో థమ్సప్ సిగ్నల్ గురించి మాట్లాడుతూ.. అది త‌న‌కు రింకూ సింగ్ మధ్య జరిగిన సంభాషణకు సంబంధించినదని తెలిపాడు.

వైభవ్‌కు హరారే మైదానం బాగా అచ్చొచ్చినట్లుంది. ఈ ఏడాది ఆరంభంలో ఇదే వేదికపై జరిగిన అండర్-19 ప్రపంచకప్ ఫైనల్‌లో ఇంగ్లండ్‌పై కేవలం 80 బంతుల్లోనే 175 పరుగులతో అజేయంగా నిలిచి భారత్‌కు ఆరోసారి టైటిల్ అందించడంలో కీలకపాత్ర పోషించాడు. అంతకుముందు సెమీఫైనల్‌లోనూ ఆఫ్ఘనిస్థాన్‌పై 68 పరుగులు చేశాడు. ఇంగ్లండ్‌తో జరిగిన తన తొలి మూడు టీ20 మ్యాచ్‌లలో 14, 13, 15 పరుగులకే ఔటైన వైభవ్, ఈ హాఫ్ సెంచరీతో తిరిగి ఫామ్‌లోకి రావడం విశేషం. 

"ఇక్కడి వాతావరణం నాకు నచ్చుతుందని చెప్పొచ్చు. కొన్ని మైదానాల్లో పరుగులు చేయడం మనకు బాగా ఇష్టం. బహుశా ఇది అలాంటిదే కావచ్చు. కానీ, నేను దీన్ని తేలికగా తీసుకోవడం లేదు. జట్టు కోసం నా అత్యుత్తమ ప్రదర్శన ఇచ్చేందుకు ప్రయత్నిస్తూనే ఉంటాను" అని వైభవ్ అన్నాడు.