‘జన నాయగన్’ నుంచి సీన్ తొలగింపు.. కన్నీటి పర్యంతమైన నటి.. ఇదిగో వీడియో!

స్టార్ హీరో సినిమాలో చిన్న పాత్రలోనైనా కనిపించాలని ఎంతోమంది నటీనటులు కలలు కంటారు. అలాంటి అవకాశం వచ్చి, ఏడాది పాటు కష్టపడ్డాక.. చివరి నిమిషంలో ఆ పాత్రను సినిమా నుంచి తొలగిస్తే ఆ బాధ వర్ణనాతీతం. ప్రస్తుతం ఇలాంటి తీవ్ర వేదననే తమిళ నటి ఆనంది అజయ్ అనుభవిస్తున్నారు. దళపతి విజయ్ నటించిన‌ 'జన నాయగన్' చిత్రం నుంచి తన సన్నివేశాన్ని తొలగించారంటూ ఆమె కన్నీటి పర్యంతమయ్యారు. ఈ మేరకు ఆమె సోషల్ మీడియాలో పోస్ట్ చేసిన ఓ భావోద్వేగ వీడియో ఇప్పుడు వైరల్ అవుతోంది.

ఈ వీడియోలో ఆనంది కన్నీళ్లు పెట్టుకుని మాట్లాడుతూ.. "ఈ సినిమా కోసం నేను దాదాపు ఏడాది పాటు పనిచేశాను. విజయ్‌తో కలిసి నటించే అవకాశం రావడం చాలా సంతోషంగా అనిపించింది. కానీ, ఇప్పుడు నా సన్నివేశాన్ని తొలగించారు. ఇది నన్ను తీవ్రంగా బాధిస్తోంది" అని తమిళంలో తన ఆవేదనను పంచుకున్నారు. విజయ్ పూర్తిస్థాయి రాజకీయాల్లోకి వెళ్లనున్న నేపథ్యంలో ఇదే ఆయనకు చివరి సినిమా అని ప్రచారం జరుగుతోంది. ఈ కారణంగా ఆయనతో కలిసి పనిచేసే మరో గొప్ప అవకాశం తనకు రాదని ఆమె తీవ్ర నిరాశ వ్యక్తం చేశారు.

ఆనంది పోస్ట్ చేసిన ఈ వీడియోకు నెటిజన్ల నుంచి భారీ స్పందన లభిస్తోంది. చాలామంది ఆమెకు మద్దతుగా నిలుస్తూ ధైర్యం చెబుతున్నారు. "మీ బాధను మేము అర్థం చేసుకోగలం. ధైర్యంగా ఉండండి, మేము మీతో ఉన్నాం. మీకు మంచి భవిష్యత్తు ఉంది. ఇంతకంటే పెద్ద అవకాశం మీ కోసం ఎదురుచూస్తోంది" అని ఒక నెటిజన్ కామెంట్ చేశారు. "ప్రతిదీ ఒక కారణం కోసమే జరుగుతుంది. త్వరలోనే మీకు మంచి ప్రధాన పాత్ర వస్తుంది" అని మరొకరు భరోసా ఇచ్చారు.

ఆనంది అజయ్ తమిళ ప్రేక్షకులకు సుపరిచితమే. ఆమె ‘కార్తిగై పెంగళ్’, ‘యమునా’, ‘కనా కానుమ్ కాలంగళ్’ వంటి పలు విజయవంతమైన టీవీ షోల ద్వారా గుర్తింపు పొందారు. ఆమె మంచి క్లాసికల్ డ్యాన్సర్, యోగా ప్రాక్టీషనర్ కూడా. ‘డ్యాన్స్ జోడీ డ్యాన్స్ 3.0’, ‘జోడీ నెం.1’ వంటి పలు డ్యాన్స్ రియాలిటీ షోలలో తన ప్రతిభతో ప్రశంసలు అందుకున్నారు. సినిమా నుంచి తన పాత్రను తొలగించడం ఆమెకు వృత్తిపరంగా నిరాశ కలిగించినప్పటికీ, అభిమానుల నుంచి లభిస్తున్న మద్దతు ఆమెకు కొంత ఊరటనిస్తోంది.