భారత్‌పై పాక్ డిజిటల్ కుట్ర.. 400 ఖాతాలపై ఢిల్లీ పోలీసుల హెచ్చరిక

దేశంలో నెలకొన్న ప్రస్తుత పరిస్థితులను ఆసరాగా చేసుకుని, సోషల్ మీడియా వేదికగా పాకిస్థాన్ భారీ దుష్ప్రచారానికి తెరలేపిందని ఢిల్లీ పోలీసులు హెచ్చరించారు. ప్రజల్లో అశాంతిని రేకెత్తించేలా తప్పుడు సమాచారాన్ని వ్యాప్తి చేస్తున్న 400కు పైగా పాకిస్థానీ సోషల్ మీడియా ఖాతాలను గుర్తించినట్లు ఓ సీనియర్ పోలీసు అధికారి వీడియో సందేశం ద్వారా వెల్లడించారు.

ఇంటెలిజెన్స్ బృందాల నిఘాలో ఈ అంశం వెలుగులోకి వచ్చిందని ఆయన తెలిపారు. ఈ ఖాతాల ద్వారా తప్పుడు కథనాలు, మార్ఫింగ్ చేసిన వీడియోలు, నిరాధారమైన సమాచారాన్ని వ్యాప్తి చేస్తూ ప్రజలను తప్పుదోవ పట్టించే ప్రయత్నం చేస్తున్నారని వివరించారు. గతంలో 'ఆపరేషన్ సిందూర్' సమయంలో క్రియాశీలంగా ఉన్న పలు ఖాతాలు ప్రస్తుతం మళ్లీ యాక్టివ్ అయినట్లు పోలీసులు గుర్తించారు.

ఈ నేపథ్యంలో, గుర్తించిన ఖాతాలను బ్లాక్ చేస్తున్నామని, సైబర్ సెల్ బృందాలు నిరంతరం (24/7) నిఘా ఉంచాయని సదరు అధికారి తెలిపారు. కేంద్ర ఏజెన్సీలతో సమన్వయం చేసుకుంటూ ఈ వ్యవహారంపై కఠిన చర్యలు తీసుకుంటున్నట్లు పేర్కొన్నారు.

ఈ సందర్భంగా ప్రజలకు పోలీసులు పలు కీలక సూచనలు జారీ చేశారు. ఏదైనా పోస్ట్ లేదా వీడియోను షేర్ చేసే ముందు వాటి వాస్తవికతను సరిచూసుకోవాలని కోరారు. పుకార్లను వ్యాప్తి చేయవద్దని, శాంతియుతంగా నిరసన తెలిపే హక్కును బాధ్యతాయుతంగా వినియోగించుకోవాలని సూచించారు. నిరాధారమైన అంశాలను షేర్ చేయడం ద్వారా దేశ వ్యతిరేక శక్తులకు పరోక్షంగా సహకరించినట్లవుతుందని, అలాంటి వారిపై సైబర్ చట్టాల కింద కఠిన చర్యలు తీసుకుంటామని హెచ్చరించారు.