టెక్ దిగ్గజం ఆల్ఫాబెట్ అనుబంధ సంస్థ గూగుల్‌కు యూరోపియన్ యూనియన్ (ఈయూ) భారీ షాక్ ఇచ్చింది. డిజిటల్ మార్కెట్స్ యాక్ట్ (డీఎంఏ) నిబంధనలను ఉల్లంఘించినందుకు ఏకంగా 890 మిలియన్ యూరోల (సుమారు రూ. 8,200 కోట్లకు పైగా) జరిమానా విధిస్తూ నిర్ణయం తీసుకుంది. టెక్ కంపెనీల ఆధిపత్యాన్ని అరికట్టే లక్ష్యంతో తీసుకొచ్చిన ఈ నూతన చట్టం కింద గూగుల్‌పై చర్యలు తీసుకోవడం ఇదే తొలిసారి.

ఈ జరిమానాను రెండు భాగాలుగా విభజించారు. గూగుల్ సెర్చ్ ఫలితాల్లో తమ సొంత సేవలైన షాపింగ్, హోటల్స్, విమాన టికెట్ల వంటి వాటికి అధిక ప్రాధాన్యత ఇస్తూ, పోటీ సంస్థల సేవలను వెనక్కు నెట్టినందుకు 460 మిలియన్ యూరోలు విధించారు. అలాగే, గూగుల్ ప్లే స్టోర్‌లో యాప్ డెవలపర్లు తమ వినియోగదారులను ఇతర ఆఫర్ల వైపు మళ్లించకుండా ఆంక్షలు విధించినందుకు మరో 430 మిలియన్ యూరోలు జరిమానా విధించినట్లు ఈయూ కమిషన్ స్పష్టం చేసింది. 2024లో దీనికి సంబంధించి విచారణ ప్రారంభం కాగా, తాజాగా ఈ తుది నిర్ణయాలు వెలువడ్డాయి.

గూగుల్ చర్యల వల్ల మార్కెట్‌లో పోటీతత్వం దెబ్బతింటోందని, ఇది వినియోగదారులకు నష్టం కలిగిస్తోందని ఈయూ అధికారులు పేర్కొన్నారు. "ఉత్తమమైన ఉత్పత్తులు వాటి నాణ్యత ఆధారంగా విజయం సాధించాలి తప్ప, అవి సెర్చ్ ఇంజిన్ యజమాని సొంతమైనవి అనే కారణంతో కాదు" అని ఈయూ కాంపిటిషన్ చీఫ్ థెరెసా రిబెరా వ్యాఖ్యానించారు.

మరోవైపు, ఈయూ నిర్ణయంపై గూగుల్ అసంతృప్తి వ్యక్తం చేసింది. ఈ నిబంధనల వల్ల వినియోగదారుల అనుభవం, భద్రతా ఫీచర్లు దెబ్బతింటాయని పేర్కొంది. ఈ తీర్పును సమీక్షిస్తున్నామని, అప్పీలుకు వెళ్లే అవకాశాలను పరిశీలిస్తున్నామని తెలిపింది. కాగా, నిబంధనలకు అనుగుణంగా మార్పులు చేసేందుకు గూగుల్‌కు 60 రోజుల గడువు ఇచ్చారు. లేనిపక్షంలో రోజువారీ ప్రపంచ టర్నోవర్‌లో 5 శాతం వరకు అదనపు జరిమానాలు ఎదుర్కోవాల్సి ఉంటుందని హెచ్చరించారు.