ఎస్ఐఆర్ ఫారంపై యువకుడి సూసైడ్ నోట్.. నా చావుకు ప్రధాని మోదీయే కారణమంటూ నోట్!

రాజన్న సిరిసిల్ల జిల్లాలో చోటుచేసుకున్న ఒక విషాద ఘటన స్థానికంగా తీవ్ర కలకలం రేపింది. 25 ఏళ్ల ఓ యువకుడు ఆత్మహత్యకు పాల్పడుతూ, తన మృతికి ప్రధానమంత్రి నరేంద్ర మోదీయే కారణమంటూ సూసైడ్ నోట్ రాయడం సంచలనంగా మారింది. ఓటర్ల జాబితా సవరణ ప్రక్రియలో వినియోగించే స్పెషల్ ఇంటెన్సివ్ రివిజన్ (ఎస్ఐఆర్) ఫారమ్‌పై అతను ఈ లేఖ రాయడం గమనార్హం.

యల్లారెడ్డిపేట మండలం రాచర్ల గొల్లపల్లి గ్రామానికి చెందిన పిట్ల వంశీ (25) గురువారం ఉదయం తన అద్దె నివాసంలో ఉరివేసుకుని విగతజీవిగా కనిపించాడు. ఇంటర్మీడియట్ వరకు చదువుకున్న వంశీ, పెయింటర్‌గా పనిచేస్తూ జీవనం సాగిస్తున్నాడు. అతని తండ్రి దినసరి కూలీ కాగా, ఆ కుటుంబం గత కొంతకాలంగా తీవ్ర ఆర్థిక ఇబ్బందులను ఎదుర్కొంటున్నట్లు సమాచారం.

సమాచారం అందుకున్న పోలీసులు వెంటనే ఘటనాస్థలికి చేరుకుని మృతదేహాన్ని స్వాధీనం చేసుకున్నారు. అనంతరం పోస్టుమార్టం నిమిత్తం సిరిసిల్ల ప్రభుత్వ ఆసుపత్రికి తరలించారు. ఈ ఘటనపై కేసు నమోదు చేసిన పోలీసులు దర్యాప్తు ప్రారంభించారు. మృతుడు మద్యపానానికి బానిసైనట్లు తెలుస్తుండగా, అతని ఆత్మహత్యకు దారితీసిన కచ్చితమైన కారణాలపై పోలీసులు విచారణ జరుపుతున్నారు.