కూతురి సాక్ష్యంతో తల్లికి జీవిత ఖైదు.. ఐదేళ్ల తర్వాత హత్య కేసులో సంచలన తీర్పు

వివాహేతర సంబంధానికి అడ్డుగా ఉన్నాడన్న కారణంతో ప్రియుడితో కలిసి కట్టుకున్న భర్తను అత్యంత దారుణంగా హత్య చేసిన కేసులో భార్య సహా ముగ్గురికి జీవిత ఖైదు పడింది. ఈ కేసులో నిందితురాలి కన్న కూతురు ఇచ్చిన సాక్ష్యమే అత్యంత కీలకంగా నిలిచింది. ఐదేళ్ల క్రితం ఆగ్రాలో సంచలనం సృష్టించిన ఈ ఘటనపై విచారణ పూర్తి చేసిన ఎస్సీ/ఎస్టీ ప్రత్యేక న్యాయస్థానం తుది తీర్పు వెలువరించింది.

వివరాల్లోకి వెళితే.. ఆగ్రాలోని తాజ్‌గంజ్ ప్రాంతానికి చెందిన నరేశ్‌ కుమార్ (35) షూ ఫ్యాక్టరీ యజమాని. 2021 జూన్ 8న ఆయన దారుణ హత్యకు గురయ్యారు. నిందితులు అతడిని ఇటుకతో దారుణంగా కొట్టి చంపి, మృతదేహాన్ని ఓ గోనె సంచిలో కుక్కి ఇంటి సమీపంలోని ఖాళీ ప్రదేశంలో పడేశారు. పోస్టుమార్టం నివేదికలో నరేశ్‌ శరీరంపై 14 బలమైన గాయాలు ఉన్నట్లు తేలింది. ఈ ఘటనపై మృతుడి తండ్రి ఫిర్యాదు మేరకు పోలీసులు హత్య, సాక్ష్యాల ధ్వంసం సెక్షన్ల కింద ఎఫ్ఐఆర్ నమోదు చేసి దర్యాప్తు ప్రారంభించారు.

వివాహేతర సంబంధమే హత్యకు కారణం
పోలీసుల దర్యాప్తులో విస్తుపోయే నిజాలు వెలుగులోకి వచ్చాయి. నరేశ్‌ భార్య ప్రమిత (33)కు, అదే ప్రాంతానికి చెందిన రవికాంత్ రాజ్‌పుత్ (31) అనే వ్యక్తితో రెండేళ్లుగా వివాహేతర సంబంధం ఉంది. ఈ విషయం తెలిసిన నరేశ్‌ వారి సంబంధాన్ని తీవ్రంగా వ్యతిరేకించాడు. ఈ క్రమంలో తనకు వారి నుంచి ప్రాణహాని ఉందని రాష్ట్ర ప్రభుత్వ ఐజీఆర్ఎస్ పోర్టల్‌లో ఫిర్యాదు కూడా చేశాడు. ఈ వివాహేతర సంబంధమే హత్యకు ప్రధాన కారణమని పోలీసులు నిర్ధారించారు. ప్రమిత, ఆమె ప్రియుడు రవికాంత్, అతని సోదరుడు శశికాంత్ రాజ్‌పుత్ (34) కలిసి ఈ హత్యకు పాల్పడినట్లు తేల్చారు.

కేసును మలుపు తిప్పిన చిన్నారి సాక్ష్యం
ఈ కేసు విచారణలో నరేశ్‌, ప్రమిత దంపతుల కుమార్తె (హత్య జరిగినప్పుడు 9 ఏళ్లు) ఇచ్చిన సాక్ష్యం కీలకంగా మారింది. హత్య జరిగిన రోజు రాత్రి తన తల్లి తమ ముగ్గురు పిల్లలను ఒక గదిలో పెట్టి తాళం వేసిందని, వారికి ఆడుకోవడానికి ఒక మొబైల్ ఫోన్, తాగేందుకు కూల్ డ్రింక్స్ ఇచ్చిందని బాలిక కోర్టుకు తెలిపింది. అర్ధరాత్రి మెలకువ వచ్చి చూడగా, మంచం పైనా, గోడలపైనా రక్తపు మరకలు కనిపించాయని చెప్పింది. ఆ సమయంలో రవికాంత్, శశికాంత్ స్వరాలు వినిపించాయని, తన తల్లి అర్ధరాత్రి స్నానం చేయడం చూశానని బాలిక వివరించింది.

విచారణ సమయంలో బాలిక తన వాంగ్మూలానికి స్థిరంగా కట్టుబడి ఉండటంతో పాటు పోలీసులు సమర్పించిన టెక్నికల్ ఆధారాలు, చాట్ రికార్డులు, మరో 10 మంది సాక్షుల వాంగ్మూలాలు నిందితులకు వ్యతిరేకంగా నిలిచాయి. ఈ సాక్ష్యాధారాలన్నింటినీ పరిశీలించిన ప్రత్యేక కోర్టు న్యాయమూర్తి శివ్ కుమార్.. ప్రమిత, రవికాంత్, శశికాంత్‌లను దోషులుగా తేల్చారు. వారికి యావజ్జీవ కారాగార శిక్షతో పాటు ఒక్కొక్కరికి రూ. 1.1 లక్షల జరిమానా విధిస్తూ తీర్పు చెప్పారు. జరిమానా చెల్లించని పక్షంలో అదనంగా మరో ఏడాది జైలు శిక్ష అనుభవించాలని ఆదేశించారు.