నాలుగు నెలల్లోనే ఒడిదొడుకులు.. అయినా ఆత్మవిశ్వాసంతో ఉన్నా: వైభవ్ సూర్యవంశీ

గత నాలుగు నెలల తన అంతర్జాతీయ కెరీర్ ఎన్నో ఒడిదొడుకులతో సాగిందని, అయినా తన ఆత్మవిశ్వాసం ఏమాత్రం చెక్కుచెదరలేదని భారత యువ బ్యాటింగ్ సంచలనం వైభవ్ సూర్యవంశీ అన్నాడు. రేప‌టి నుంచి జింబాబ్వేతో ప్రారంభం కానున్న మూడు మ్యాచ్‌ల టీ20 సిరీస్‌కు ముందు తాను తన ఆట ప్రక్రియపైనే పూర్తి దృష్టి సారించినట్లు స్పష్టం చేశాడు.

ఇంగ్లండ్‌తో జరిగిన టీ20 సిరీస్‌లో 15 ఏళ్ల వయసులోనే అరంగేట్రం చేసిన సూర్యవంశీ, సచిన్ టెండూల్కర్ రికార్డును బద్దలు కొట్టి భారత్ తరఫున ఆడిన అత్యంత పిన్న వయస్కుడైన క్రికెటర్‌గా చరిత్ర సృష్టించాడు. అయితే, ఆ సిరీస్‌లో ఆడిన మూడు ఇన్నింగ్స్‌లలోనూ 20 పరుగుల మార్కును దాటలేకపోవడంతో చివరి మ్యాచ్‌కు అతడిని పక్కనపెట్టారు.

ఈ నేపథ్యంలో 'బీసీసీఐ.టీవీ'కి ఇచ్చిన వీడియోలో సూర్యవంశీ మాట్లాడుతూ.. "అవును.. గడిచిన నాలుగు నెలల్లో చాలా ఒడిదొడుకులు చూశాను. ఇది క్రికెట్‌లో భాగం, ఇలాంటివి జరుగుతూనే ఉంటాయి. కానీ నేను నా ప్రక్రియను నమ్ముకుని, జట్టు కోసం 100 శాతం ప్రదర్శన ఇవ్వాలి. నాకు అవసరమైన మార్గదర్శకత్వం, ప్రాక్టీస్‌ను కోచ్‌లు అందిస్తున్నారు. నాలో ఆత్మవిశ్వాసం ఉంది, చాలా బాగుంది" అని చెప్పాడు.

ఈ సిరీస్‌తో సూర్యవంశీ తనకు ఎంతో ప్రత్యేకమైన హరారే స్పోర్ట్స్ క్లబ్‌కు తిరిగి వస్తున్నాడు. సరిగ్గా నాలుగు నెలల క్రితం ఇదే మైదానంలో అండర్-19 ప్రపంచకప్ ఫైనల్‌లో ఇంగ్లండ్‌పై 80 బంతుల్లో 175 పరుగులతో విధ్వంసకర ఇన్నింగ్స్ ఆడి భారత్‌కు కప్ అందించాడు. "ఇది నాకు చాలా గుర్తుండిపోయే మైదానం. ఇక్కడ అండర్-19 ప్రపంచకప్ గెలిచాం. ఇప్పుడు అదే మైదానంలో దేశం తరఫున ఆడటం సరికొత్త అనుభూతినిస్తోంది. దీన్ని నేను ఆస్వాదిస్తున్నాను" అని సూర్యవంశీ పేర్కొన్నాడు.

సీనియర్ ఓపెనర్ సంజూ శాంసన్‌కు ఈ సిరీస్‌కు విశ్రాంతినివ్వడంతో సూర్యవంశీ టాప్ ఆర్డర్‌లో బరిలోకి దిగే అవకాశం ఉంది. "అండర్-19 ప్రపంచకప్ సమయంలో ఇక్కడి పిచ్‌లు, పరిస్థితులపై నాకు మంచి అవగాహన వచ్చింది. అప్పుడు నేర్చుకున్న విషయాలను ఇప్పుడు ఉపయోగించి రాణించడానికి ప్రయత్నిస్తాను. నా ప్రాక్టీస్‌ను నమ్ముకుని, జట్టు విజయానికి నా వంతు సహకారం అందిస్తాను" అని అతను ధీమా వ్యక్తం చేశాడు.