నెతన్యాహు అరెస్ట్‌పై యూ-టర్న్.. చట్టపరమైన పరిమితులతో వెనక్కి తగ్గిన న్యూయార్క్ మేయర్!

ఇజ్రాయెల్ ప్రధాని బెంజమిన్ నెతన్యాహు న్యూయార్క్ వస్తే అంతర్జాతీయ నేర న్యాయస్థానం (ఐసీసీ) వారెంట్ ఆధారంగా అరెస్ట్ చేస్తానన్న ఎన్నికల హామీ నుంచి న్యూయార్క్ మేయర్ జోహ్రాన్ మామ్దానీ వెనక్కి తగ్గారు. నగర పరిపాలనా రంగానికి అటువంటి అరెస్టులు చేసే స్వతంత్ర చట్టపరమైన అధికారం లేదని న్యాయ సమీక్షలో తేలడంతో ఆయన ఈ నిర్ణయం తీసుకున్నారు. అయినప్పటికీ నెతన్యాహును 'యుద్ధ నేరస్థుడు'గా అభివర్ణించిన మామ్దానీ, సెప్టెంబరులో ఐక్యరాజ్యసమితి సర్వసభ్య సమావేశానికి వస్తున్న ఆయనను డొనాల్డ్ ట్రంప్ ప్రభుత్వమే బంధించాలని కోరారు.

ఐసీసీ జారీ చేసిన అరెస్ట్ వారెంట్‌ను అమలు చేసే అధికారం కేవలం ఫెడరల్ ప్రభుత్వానికే ఉందని స్పష్టం చేశారు. అయితే అమెరికా పర్యటనలో ఉన్నప్పుడు నెతన్యాహును అరెస్ట్ చేయబోరని అధ్యక్షుడు ట్రంప్ అంతకుముందే తేల్చిచెప్పారు. దీనిపై మామ్దానీ స్పందిస్తూ, నెతన్యాహు పాలస్తీనియన్లపై నరమేధానికి పాల్పడ్డారని, న్యూయార్క్ నగరంలోకి ఆయనకు ఎలాంటి స్వాగతం లేదని తెలిపారు. మరోవైపు ఈ ఆరోపణలను ఇజ్రాయెల్ ప్రధాని కార్యాలయం తీవ్రంగా ఖండించింది. అమెరికన్లు లేదా ఇజ్రాయెలీలపై ఐసీసీకి ఎలాంటి అధికార పరిధి లేదని, అది ఒక చెల్లుబాటు లేని న్యాయస్థానమని ఎక్స్ వేదికగా తీవ్రంగా విమర్శించింది.