లిక్కర్ స్కామ్: వాసుదేవ రెడ్డి, మాజీ మంత్రి కుమారుడికి ఆగస్టు 3 వరకు రిమాండ్

ఆంధ్రప్రదేశ్‌లో సంచలనం సృష్టించిన మద్యం రవాణా టెండర్ల కుంభకోణం కేసులో ముగ్గురు ప్రధాన నిందితులకు విజయవాడలోని ఏసీబీ ప్రత్యేక కోర్టు ఆగస్టు 3 వరకు జ్యుడీషియల్ కస్టడీ విధించింది. ఈ కేసులో నిందితులుగా ఉన్న ఏపీ స్టేట్ బేవరేజెస్ కార్పొరేషన్ లిమిటెడ్ (APSBCL) మాజీ మేనేజింగ్ డైరెక్టర్ దొంతిరెడ్డి వాసుదేవ రెడ్డి (A1), మాజీ మంత్రి కారుమూరి నాగేశ్వరరావు కుమారుడు కారుమూరి సునీల్ (A4), మరియు రాజ్ కసిరెడ్డి (A8)లకు కోర్టు రిమాండ్ విధించింది.

హైదరాబాద్‌లోని చంచల్‌గూడ జైలులో రిమాండ్ ఖైదీలుగా ఉన్న ఈ ముగ్గురిని ప్రత్యేక దర్యాప్తు బృందం (సిట్) అధికారులు ప్రిజనర్ ట్రాన్సిట్ (పీటీ) వారెంట్‌పై సోమవారం విజయవాడకు తీసుకువచ్చారు. ప్రభుత్వ ఆసుపత్రిలో వైద్య పరీక్షల అనంతరం వారిని న్యాయమూర్తి ఎదుట హాజరుపరిచారు. ఈ సందర్భంగా నిందితుల తరఫు న్యాయవాదులు వాదనలు వినిపిస్తూ.. నిందితులు ఇప్పటికే ఈడీ కేసులో అరెస్టయ్యారని, వారికి 41A నోటీసులు జారీ చేయాలని కోరారు. అలాగే కుటుంబ సభ్యులను కలిసేందుకు వీలుగా వారిని చంచల్‌గూడ జైలులోనే ఉంచాలని న్యాయస్థానాన్ని అభ్యర్థించారు.

మరోవైపు, సిట్ తరఫు ప్రాసిక్యూటర్లు తమ వాదనలను వినిపిస్తూ.. ఈ కుంభకోణంలో వాసుదేవ రెడ్డి కీలక పాత్ర పోషించారని వివరించారు. టెండర్ల నిబంధనలను ఇష్టానుసారంగా మార్చి, రేట్లను పెంచి ప్రభుత్వ ఖజానాకు భారీ నష్టం చేకూర్చారని ఆరోపించారు. మాజీ మంత్రి కుమారుడు సునీల్ తన తండ్రి పరపతిని అడ్డం పెట్టుకుని అక్రమాలకు పాల్పడ్డారని, ఈ ప్రక్రియలో రూ. 16 కోట్లు ముడుపులుగా తీసుకున్నారని రిమాండ్ రిపోర్ట్‌లో పేర్కొన్నారు. ఇందుకు సంబంధించిన వాట్సాప్ సంభాషణలు, బ్యాంకు లావాదేవీల వివరాలను ఆధారాలుగా కోర్టుకు సమర్పించారు.

ఉభయ పక్షాల వాదనలు విన్న న్యాయమూర్తి, నిందితులకు ఆగస్టు 3 వరకు జ్యుడీషియల్ కస్టడీ విధిస్తూ ఉత్తర్వులు జారీ చేశారు. నిందితులను తిరిగి చంచల్‌గూడ జైలుకే తరలించాలని ఈ సందర్భంగా ఆదేశించారు. గత ప్రభుత్వ హయాంలో మద్యం రవాణా టెండర్లలో జరిగిన అవకతవకల కారణంగా ప్రభుత్వానికి సుమారు రూ. 192 కోట్ల మేర నష్టం వాటిల్లినట్లు సిట్ ప్రాథమికంగా నిర్ధారించింది.