బాలీవుడ్ కండల వీరుడు సల్మాన్ ఖాన్ తన ఆరోగ్యంపై గత కొన్ని రోజులుగా సోషల్ మీడియాలో జరుగుతున్న చర్చకు తనదైన శైలిలో చమత్కారంగా సమాధానమిచ్చారు. ఇటీవల ఓ కార్యక్రమంలో ఆయన నీరసంగా కనిపించడంతో అభిమానులు ఆందోళన వ్యక్తం చేశారు. ఈ నేపథ్యంలో "మీ అందరి ఆరోగ్యం ఎలా ఉంది?" అంటూ ఇన్‌స్టాగ్రామ్‌లో ఒక పోస్ట్ పెట్టి, ఈ వదంతులకు స్టైలిష్‌గా చెక్ పెట్టారు.

అసలేం జరిగిందంటే..!
కొన్ని రోజుల క్రితం సల్మాన్ ఖాన్ ముంబైలోని మురికివాడల పునరావాస ప్రాధికార సంస్థ (ఎస్ఆర్ఏ) కార్యాలయంలో జరిగిన ఓ కార్యక్రమానికి హాజరయ్యారు. అక్కడ కొత్తగా ఏర్పాటు చేసిన డేటా కలెక్షన్, వెరిఫికేషన్ సపోర్ట్ సెంటర్‌ను (ఐటీ సర్వర్ రూమ్) ప్రారంభించారు. ఈ సందర్భంగా కొందరు లబ్ధిదారులకు ఇంటి తాళాలను కూడా అందజేశారు. అయితే, ఈ కార్యక్రమానికి సంబంధించిన వీడియోలు, ఫొటోలు ఆన్‌లైన్‌లో వైరల్ కావడంతో చర్చ మొదలైంది.

ఈ ఫొటోలలో సల్మాన్ ఖాన్ మునుపటి కంటే చాలా బక్కచిక్కి, నీరసంగా, అలసిపోయినట్లు కనిపించారని పలువురు నెటిజన్లు కామెంట్లు చేశారు. ఆయన ఆరోగ్యంపై ఆందోళన వ్యక్తం చేశారు. "భాయ్‌కు ఏమైంది?", "అనారోగ్యంగా ఉన్నట్లున్నారు, దేవుడు ఆయన్ను చల్లగా చూడాలి", "మా హీరోకి వయసైపోతోంది", "సల్మాన్‌కు ఏదో తీవ్రమైన సమస్య ఉన్నట్టుంది" అంటూ రకరకాల కామెంట్లు వెల్లువెత్తాయి.

ఒక్క పోస్ట్‌తో ఫుల్‌స్టాప్
అభిమానుల ఆందోళన, సోషల్ మీడియాలో జరుగుతున్న ఈ చర్చపై సల్మాన్ ఖాన్ నేరుగా స్పందించారు. తన లేటెస్ట్ ఫొటోలను ఇన్‌స్టాగ్రామ్‌లో షేర్ చేస్తూ.. "ఆప్ లోగోం కీ తబియత్ కైసీ హై" (మీ అందరి ఆరోగ్యం ఎలా ఉంది?) అని క్యాప్షన్ జోడించారు. తన ఆరోగ్యం గురించి ఆందోళన పడుతున్న వారిని ఉద్దేశించే ఆయన ఈ పోస్ట్ పెట్టారని స్పష్టమవుతోంది.

సల్మాన్ పోస్ట్ చూసిన ఫ్యాన్స్ కూడా సరదాగా స్పందించారు. ఆయన చమత్కారాన్ని అర్థం చేసుకుని కామెంట్లు పెట్టారు. నటి మహి విజ్ కూడా ఈ పోస్ట్‌పై స్పందిస్తూ నవ్వుతున్న ఎమోజీలను పంచుకున్నారు. మొత్తానికి తనపై వస్తున్న అనారోగ్య వదంతులకు సల్మాన్ తనదైన శైలిలో ఒక్క పోస్ట్‌తో ఫుల్‌స్టాప్ పెట్టారు.