అల్పపీడన ప్రభావం.. తెలంగాణలో వానలు.. ఉక్కపోత నుంచి ఉపశమనం

గత కొన్ని రోజులుగా తీవ్రమైన ఎండలు, ఉక్కపోతతో అల్లాడుతున్న తెలంగాణ ప్రజలకు వాతావరణ శాఖ చల్లని కబురు అందించింది. బంగాళాఖాతంలో ఏర్పడిన అల్పపీడన ప్రభావంతో రాష్ట్రవ్యాప్తంగా వాతావరణం ఒక్కసారిగా మారిపోయింది. పలు జిల్లాల్లో మోస్తరు వర్షాలు కురుస్తుండటంతో ప్రజలకు వేడి నుంచి ఉపశమనం లభించింది. ఈ నెల 22వ తేదీ వరకు రాష్ట్రంలో పలుచోట్ల వర్షాలు కొనసాగే అవకాశం ఉందని హైదరాబాద్ వాతావరణ కేంద్రం వెల్లడించింది.

బంగాళాఖాతంలో ఉత్తర ఒడిశా-పశ్చిమబెంగాల్ తీర ప్రాంతంలో అల్పపీడనం ఏర్పడింది. దీనికి అనుబంధంగా మరో ద్రోణి కొనసాగుతోంది. వీటి ప్రభావంతో తెలంగాణలో ముఖ్యంగా ఉత్తర, మధ్య జిల్లాల్లో ఉరుములు, మెరుపులతో కూడిన వర్షాలు కురుస్తాయని వాతావరణ శాఖ అధికారులు తెలిపారు. కొన్ని ప్రాంతాల్లో బలమైన ఈదురు గాలులు కూడా వీచే అవకాశం ఉందని హెచ్చరించారు. ఇప్పటికే ఇవాళ‌ తెల్లవారుజామున హైదరాబాద్ నగరంలోని పలు ప్రాంతాల్లో వర్షం కురిసింది. రేపు ఉత్తర తెలంగాణ జిల్లాల్లో బలమైన ఉపరితల గాలులు వీస్తాయని అంచనా వేస్తున్నారు.

నిన్న‌ సాయంత్రం నుంచే రాష్ట్రంలోని పలు జిల్లాల్లో వాతావరణం చల్లబడింది. రంగారెడ్డి జిల్లా రెడ్డిపల్లిలో 4.3 సెంటీమీటర్లు, నల్గొండ జిల్లా చండూరులో 3.5 సెంటీమీటర్ల వర్షపాతం నమోదైంది. రంగారెడ్డి, సంగారెడ్డి, వికారాబాద్‌, మహబూబ్‌నగర్‌, ములుగు, మంచిర్యాల, ఆసిఫాబాద్‌ జిల్లాల్లోని కొన్ని ప్రాంతాల్లో తేలికపాటి నుంచి మోస్తరు జల్లులు పడ్డాయి. నిన్న‌ పగటిపూట నిజామాబాద్‌లో సాధారణం కన్నా 3.8 డిగ్రీలు అధికంగా 35.5 డిగ్రీల ఉష్ణోగ్రత నమోదు కాగా, సాయంత్రానికి వాతావరణం చల్లబడటం గమనార్హం.

నైరుతి రుతుపవనాలు రాష్ట్రంలో ప్రవేశించినప్పటికీ ఆశించిన స్థాయిలో వర్షాలు కురవకపోవడంతో రైతులు ఆందోళన చెందుతున్నారు. ఖరీఫ్ సాగు పనులు నెమ్మదించాయి. ఇలాంటి తరుణంలో అల్పపీడనం కారణంగా కురుస్తున్న ఈ వర్షాలు వ్యవసాయ పనులకు ఊతమిస్తాయని, పంటలకు జీవం పోస్తాయని రైతులు ఆశాభావం వ్యక్తం చేస్తున్నారు. రాష్ట్రవ్యాప్తంగా భారీ వర్షాలు లేకపోయినా, ఈ జల్లులు ఎండల తీవ్రతను తగ్గించి ప్రజలకు, రైతులకు కొంత ఊరటనిస్తున్నాయి.