చిన్నస్వామి స్టేడియం తొక్కిసలాట కేసు: ముగ్గురు ఐపీఎస్‌లకు క్లీన్‌చిట్

బెంగళూరులోని చిన్నస్వామి స్టేడియం వద్ద గతేడాది జరిగిన తొక్కిసలాట ఘటనకు సంబంధించి ముగ్గురు సీనియర్ ఐపీఎస్ అధికారులకు కర్ణాటక ప్రభుత్వం క్లీన్‌చిట్ ఇచ్చింది. ఈ ఘటనలో 11 మంది ప్రాణాలు కోల్పోయిన నేపథ్యంలో సస్పెండైన ఐపీఎస్ అధికారులు బి. దయానంద, వికాష్ కుమార్ వికాష్, శేఖర్ హెచ్. టెక్కన్నవర్‌లపై చేపట్టిన శాఖాపరమైన విచారణను మూసివేస్తున్నట్లు ప్రభుత్వం మంగళవారం ఉత్తర్వులు జారీ చేసింది.

2025 జూన్ 4న రాయల్ ఛాలెంజర్స్ బెంగళూరు (ఆర్సీబీ) తొలిసారి ఐపీఎల్ టైటిల్ గెలిచిన సందర్భంగా ఏర్పాటు చేసిన వేడుకల్లో తీవ్ర తొక్కిసలాట జరిగింది. ఈ ఘటనలో భద్రతా వైఫల్యాలున్నాయని ఆరోపణలు రావడంతో, అప్పటి బెంగళూరు నగర పోలీస్ కమిషనర్‌గా ఉన్న బి. దయానంద, అదనపు కమిషనర్ (వెస్ట్)గా ఉన్న వికాష్ కుమార్ వికాష్, డీసీపీ (సెంట్రల్)గా ఉన్న శేఖర్ హెచ్. టెక్కన్నవర్‌లను ప్రభుత్వం జూన్ 5న సస్పెండ్ చేసింది.

అనంతరం వారి సస్పెన్షన్‌ను ఎత్తివేసినప్పటికీ, ఆల్ ఇండియా సర్వీసెస్ (డిసిప్లిన్ అండ్ అప్పీల్) రూల్స్, 1969 కింద శాఖాపరమైన విచారణ కొనసాగింది. అధికారులు సమర్పించిన వివరణలు, పరిపాలన శాఖ అభిప్రాయాన్ని పరిశీలించిన తర్వాత, వారిపై విచారణను కొనసాగించడానికి తగిన ఆధారాలు లేవని సమర్థ అధికార సంస్థ (కాంప్టెంట్ అథారిటీ) తేల్చిందని ప్రభుత్వం తన ఉత్తర్వుల్లో పేర్కొంది. ఈ మేరకు వారిపై నమోదైన ఆరోపణల నుంచి విముక్తి కల్పిస్తూ, కేసును మూసివేస్తున్నట్లు స్పష్టం చేసింది.

అయితే, టెక్కన్నవర్‌ను నిర్దోషిగా ప్రకటిస్తూనే, భవిష్యత్తులో ఇలాంటి ఘటనలు పునరావృతం కాకుండా బాధ్యతాయుతంగా వ్యవహరించాలని ప్రభుత్వం హెచ్చరిక జారీ చేయడం గమనార్హం.

గతేడాది జరిగిన ఈ దుర్ఘటనలో 11 మంది మరణించగా, 56 మందికి పైగా గాయపడ్డారు. విజయోత్సవ వేడుకల కోసం దాదాపు 2.5 లక్షల మంది అభిమానులు స్టేడియం వద్దకు ఒక్కసారిగా తరలిరావడంతో భద్రతా ఏర్పాట్లు విఫలమై ఈ విషాదం చోటుచేసుకుంది. తాజా ఉత్తర్వులతో ఈ కేసులో అధికారులపై నడిచిన విచారణ ప్రక్రియ అధికారికంగా ముగిసినట్లయింది.