అమ్మానాన్నలు ప్రేమను ప్యాక్ చేసి పంపారు.. ప్రవాస భారతీయురాలి భావోద్వేగం.. వైరల్ వీడియో!

విదేశాల్లో ఉంటున్న ఎంతోమంది భారతీయులకు స్వ‌దేశం నుంచి త‌మ‌వారు పంపించే చిన్న‌చిన్న‌ వ‌స్తువులు కూడా ఎంతంటి ఆనందాన్ని క‌లిగిస్తాయో ప్ర‌త్యేకంగా చెప్ప‌న‌క్క‌ర్లేదు. క్ష‌ణాల్లో వారిని స్వ‌దేశంలో గ‌డిపిన క్ష‌ణాల‌ను గుర్తు చేస్తాయి. ఆ మ‌ధుర క్ష‌ణాలు వారి హృద‌యాల్లో ఎన‌లేని సంతోషాన్ని నింపుతాయి. ఆ అనుభూతి మాటల్లో చెప్పలేనిది. సరిగ్గా ఇలాంటి ఓ మధురమైన అనుభూతిని పంచుకుంటూ కెనడాలో నివసిస్తున్న ఓ యువతి పోస్ట్ చేసిన వీడియో ఇప్పుడు సోషల్ మీడియాలో లక్షలాది మంది మనసులను గెలుచుకుంటోంది. భారతదేశంలోని ఆమె తల్లిదండ్రులు పంపిన 20 కిలోల పార్శిల్‌లో కేవలం వస్తువులు మాత్రమే కాదు, కొలవలేని ప్రేమ, ఆప్యాయత నిండి ఉన్నాయి.

కెనడాలో ఉంటున్న హిమానీ పర్మార్ అనే యువతి ఇన్‌స్టాగ్రామ్‌లో ఈ వీడియోను షేర్ చేశారు. ఇండియా నుంచి వచ్చిన పెద్ద కార్టన్‌ను ఆమె ఓపెన్ చేయడంతో వీడియో మొదలవుతుంది. ఆ పెట్టెను విప్పుతుంటే అందులో నుంచి ఒక్కొక్కటిగా వస్తువులు బయటకు రావడం కనిపిస్తుంది. ఆమ్రాస్, థేప్లా వంటి ఇంట్లో చేసిన ఆహార పదార్థాలతో పాటు, ప్యాక్ చేసిన స్నాక్స్, మామిడి పండ్లు ఉన్నాయి. వాటితో పాటు హిమానీకి, ఆమె భర్తకు అవసరమైన బట్టలు, ఇతర బహుమతులు కూడా జాగ్రత్తగా సర్ది ఉన్నాయి. "20 కిలోల ప్రేమను, ఆమ్రాస్‌ను అమ్మానాన్నలు పంపినప్పుడు.." అనే క్యాప్షన్‌ను ఆమె వీడియోకు జోడించారు.

ఈ పార్శిల్ కేవలం వస్తువుల మూట కాదని, అంతులేని ప్రేమను నింపుకొచ్చిన ఆప్యాయత అని ఆమె తన పోస్టులో పేర్కొన్నారు. విదేశాల్లో నివసించే భారతీయులకు మాత్రమే ఇంటి నుంచి వచ్చే ఇలాంటి పార్శిల్ వెనుక ఉన్న భావోద్వేగాలు అర్థమవుతాయని ఆమె అన్నారు. "ఇందులో కేవలం మామిడి పండ్ల గుజ్జు, బట్టలు, బహుమతులు మాత్రమే లేవు. లెక్కలేనన్ని ప్రేమ క్షణాలు ఉన్నాయి" అని హిమానీ రాసుకొచ్చారు.

తన తల్లిదండ్రులు షాపులు తిరుగుతూ, ప్రతి వస్తువును జాగ్రత్తగా ఎంపిక చేస్తూ, రుచి మారకూడదని ఉత్తమమైన మామిడి పండ్లను ఏరికోరి పంపిన దృశ్యాలు తన కళ్ల ముందు కదలాడాయని హిమానీ వివరించారు. ఆ పెట్టెలోని ప్రతి వస్తువులోనూ వారి గుండెలోని ప్రేమ క‌నిపిస్తుంద‌ని, ఆ ప్యాకింగ్‌లోని ప్రతి పొరలో తన తల్లిదండ్రుల వెచ్చదనాన్ని అనుభూతి చెందానని ఆమె భావోద్వేగానికి గురయ్యారు.

పిల్లలు ఎంత పెద్దవారైనా, ఎంత దూరం వెళ్లినా తల్లిదండ్రులు వారిని చూసుకోవడం ఎప్పటికీ ఆపరని, భౌతిక దూరం కుటుంబాలను వేరు చేయొచ్చేమో గానీ, ప్రేమను మాత్రం ఎప్పటికీ తగ్గించలేదని ఆమె తన పోస్టులో పేర్కొన్నారు.

ఆమె పోస్ట్ చేసిన ఈ వీడియో సోషల్ మీడియాలో, ముఖ్యంగా ఇతర దేశాల్లో ఉంటున్న ప్రవాస భారతీయుల మనసులను హత్తుకుంది. చాలా మంది తమకు కూడా ఇలాంటి పార్శిల్స్ తమ కుటుంబ సభ్యుల నుంచి వచ్చాయని, ఆ జ్ఞాపకాలను ఈ వీడియో గుర్తు చేసిందని కామెంట్లు చేశారు. మైళ్ల దూరం ఆత్మీయులను వేరు చేస్తున్నా, ఇలాంటి ఆప్యాయత నిండిన పనులు ఆ దూరాన్ని చెరిపేసి, ప్రేమ వారధిగా నిలుస్తాయని ఈ ఘటన మరోసారి నిరూపించింది.