చొక్కా విప్పి తిప్పిన గంగూలీ.. ఆ సీన్‌ను రీ క్రియేట్ చేసిన రాజ్ కుమార్ రావు.. 'దాదా' ఫస్ట్ లుక్ పోస్టర్ చూశారా?

భారత క్రికెట్ జట్టు మాజీ కెప్టెన్, 'బెంగాల్ టైగర్' సౌరవ్ గంగూలీ బయోపిక్ కోసం ఎదురుచూస్తున్న అభిమానులకు చిత్రబృందం అద్భుతమైన కానుక ఇచ్చింది. గంగూలీ 54వ పుట్టినరోజు సందర్భంగా బుధవారం, ఆయన బయోపిక్ 'దాదా: ది సౌరవ్ గంగూలీ స్టోరీ' ఫస్ట్ లుక్ పోస్టర్‌ను విడుదల చేసింది. ఈ చిత్రంలో గంగూలీ పాత్రను జాతీయ అవార్డు గ్రహీత రాజ్ కుమార్ రావు పోషిస్తున్నారు. ఈ సినిమా వచ్చే ఏడాది మే 14న విడుదల కానున్నట్టు ప్రకటించారు.

రాజ్ కుమార్ రావు తన సోషల్ మీడియా ఖాతా ద్వారా ఈ పోస్టర్‌ను పంచుకుంటూ గంగూలీకి పుట్టినరోజు శుభాకాంక్షలు తెలిపారు. ఈ పోస్టర్‌లో 2002లో లార్డ్స్ బాల్కనీలో గంగూలీ చొక్కా విప్పి గాల్లో తిప్పుతూ సంబరాలు చేసుకున్న చారిత్రాత్మక దృశ్యాన్ని రాజ్ కుమార్ రావు పునఃసృష్టించారు. ఆయన వెనుక భారత త్రివర్ణ పతాకం రెపరెపలాడుతూ కనిపించింది. పోస్టర్‌పై "ఆయన ఆట ఆడటమే కాదు.. ఆటనే మార్చేశాడు" అనే ట్యాగ్‌లైన్ ఆకట్టుకుంటోంది.

2002లో ఇంగ్లండ్‌తో జరిగిన నాట్‌వెస్ట్ ట్రోఫీ ఫైనల్‌లో 325 పరుగుల భారీ లక్ష్యాన్ని భారత్ ఛేదించి చారిత్రాత్మక విజయం సాధించింది. ఆ గెలుపు తర్వాత గంగూలీ తన ఆనందాన్ని ఆపుకోలేక లార్డ్స్ బాల్కనీలో షర్ట్ విప్పి గిరగిరా తిప్పారు. ఆ రోజు భారత క్రికెట్ రూపురేఖలను మార్చిన ఘటనగా నిలిచిపోయింది. 'మనం గెలుస్తామని నేను అస్సలు నమ్మలేదు' అని ఆ విజయం తర్వాత గంగూలీ చెప్పిన మాటలు అప్పట్లో సంచలనం సృష్టించాయి.

'దాదా' చిత్రానికి విక్రమాదిత్య మోత్వానే దర్శకత్వం వహిస్తుండగా, లవ్ ఫిల్మ్స్ పతాకంపై లవ్ రంజన్, అంకుర్ గార్గ్ నిర్మిస్తున్నారు. ఈ చిత్రంలో గంగూలీ భార్య డోనా గంగూలీ పాత్రలో తాన్యా మానిక్తాలా నటిస్తున్నారు. భారత క్రికెట్‌కు మహారాజుగా పేరుగాంచిన గంగూలీ, తన కెప్టెన్సీలో జట్టును 2003 ప్రపంచకప్ ఫైనల్ వరకు నడిపించారు. వన్డేల్లో 11,363 పరుగులు చేసిన ఆయన, 2004లో పద్మశ్రీ పురస్కారం అందుకున్నారు. 2012లో అన్ని ఫార్మాట్ల క్రికెట్‌కు గంగూలీ వీడ్కోలు పలికారు.