భారత్‌లో టెస్లా కొత్త ఛార్జింగ్ కేంద్రం.. షాపింగ్ చేస్తూనే కారుకు ఛార్జింగ్.. పూర్తి వివరాలు ఇవే!

ప్రముఖ ఎలక్ట్రిక్ వాహన తయారీ సంస్థ టెస్లా, భారత్‌లో తన ఛార్జింగ్ నెట్‌వర్క్‌ను వేగంగా విస్తరిస్తోంది. ఇందులో భాగంగా ఉత్తర భారతదేశంలోనే మొట్టమొదటి ఇన్-మాల్ ఛార్జింగ్ కేంద్రాన్ని నేడు ఢిల్లీలో ప్రారంభించినట్లు ప్రకటించింది. ఢిల్లీలోని నెక్సస్ సెలెక్ట్ సిటీవాక్ మాల్‌లో ఈ సౌకర్యాన్ని ఏర్పాటు చేసింది. దీంతో వినియోగదారులు షాపింగ్ లేదా డైనింగ్ చేసే సమయంలోనే తమ టెస్లా కార్లకు ఛార్జింగ్ పెట్టుకునే వీలు కలుగుతుంది.

ఈ కొత్త ఛార్జింగ్ కేంద్రంలో 11 కిలోవాట్ల సామర్థ్యం గల ఆరు డెస్టినేషన్ ఛార్జర్లను (ఏసీ) ఏర్పాటు చేసినట్టు కంపెనీ తెలిపింది. మాల్‌లోని P1 పార్కింగ్ ఏరియాలో ఉన్న ఈ ఛార్జర్లు 99.95 శాతం అప్‌టైమ్‌తో అత్యంత విశ్వసనీయంగా పనిచేస్తాయని పేర్కొంది. ఈ కొత్త కేంద్రంతో కలిపి భారత్‌లో టెస్లా నిర్వహిస్తున్న ఛార్జింగ్ స్టేషన్ల సంఖ్య 6కి చేరింది. దేశవ్యాప్తంగా ఇప్పుడు మొత్తం 20 సూపర్‌ఛార్జర్లు, 20 డెస్టినేషన్ ఛార్జర్లు అందుబాటులోకి వచ్చాయి.

ఈ సందర్భంగా, టెస్లా తన కొత్త మోడళ్లను ప్రదర్శించేందుకు జులై 6 నుంచి 10 వరకు అదే మాల్‌లో ఒక పాప్-అప్ స్టోర్‌ను కూడా నిర్వహిస్తోంది. ఇక్కడకు వచ్చే సందర్శకులు కొత్తగా విడుదలైన మోడల్ వై ఎల్, 2026 మోడల్ వై ప్రీమియం రియర్-వీల్ డ్రైవ్ (ఆర్‌డ‌బ్ల్యూడీ) కార్లను దగ్గర నుంచి చూసే అవకాశం ఉంది. సంస్థ ప్రతినిధులు ఈ కార్ల ఫీచర్లను వివరించడంతో పాటు, టెస్ట్ డ్రైవ్ సౌకర్యాన్ని కూడా కల్పిస్తున్నారు.

కొత్త మోడళ్ల వివరాలు: మోడల్ వై ఎల్ ఆరు సీట్ల సామర్థ్యంతో, ఆల్-వీల్ డ్రైవ్ ఆప్షన్‌తో వస్తుంది. మూడు వరుసల సీటింగ్ లేఅవుట్ ఉన్న ఈ ఎలక్ట్రిక్ ఎస్‌యూవీ ఒక్కసారి ఛార్జింగ్‌తో 681 కిలోమీటర్ల (డ‌బ్ల్యూఎల్‌టీపీ) రేంజ్ ఇస్తుందని కంపెనీ చెబుతోంది. ఇది కేవలం 5 సెకన్లలో 0 నుంచి 100 కిలోమీటర్ల వేగాన్ని అందుకుంటుంది. దీని ప్రారంభ ధర రూ. 61.99 లక్షలుగా ఉంది.

ఇక, ఐదు సీట్ల సామర్థ్యం గల 2026 మోడల్ వై ప్రీమియం ఆర్‌డ‌బ్ల్యూడీ, ఒక్కసారి ఛార్జింగ్‌తో 500 కిలోమీటర్ల (డ‌బ్ల్యూఎల్‌టీపీ) రేంజ్ అందిస్తుంది. ఇది 5.9 సెకన్లలో 0 నుంచి 100 కిలోమీటర్ల వేగాన్ని అందుకుంటుంది. దీని ప్రారంభ ధర రూ. 50.89 లక్షలుగా నిర్ణయించారు. 

ఈ రెండు మోడళ్లు కూడా యూరో ఎన్‌సీఏపీ, ఎన్‌హెచ్‌టీఎస్ఏ వంటి గ్లోబల్ ఏజెన్సీల నుంచి టాప్ సేఫ్టీ రేటింగ్స్ అందుకున్నాయని కంపెనీ స్పష్టం చేసింది. ఈ కార్లను టెస్లా అధికారిక వెబ్‌సైట్ ద్వారా బుక్ చేసుకోవచ్చని, దేశంలోని అన్ని రాష్ట్రాల్లో హోమ్ ఛార్జింగ్ సపోర్ట్ అందుబాటులో ఉందని సంస్థ వెల్లడించింది.