కొండపై హత్యకు ముందే రిహార్సల్‌.. పుణే కేసులో సంచలన విషయాలు

పుణేలో సంచలనం సృష్టించిన రియల్టర్ కేతన్ అగర్వాల్ హత్య కేసులో దర్యాప్తు ముందుకు వెళుతోన్న కొద్దీ సంచలన విషయాలు వెలుగులోకి వస్తున్నాయి. హత్యకు ముందు నిందితులు సియా గోయల్, చేతన్ చౌదరి ఓ కొండపై రిహార్సల్ చేసినట్లు పోలీసుల విచారణలో వెల్లడైంది.

మార్కెట్ యార్డ్ సమీపంలోని ఓ కొండపై హత్య ఎలా చేయాలనే దానిపై ముందుగా ప్రాక్టీస్ చేసినట్లు ఇద్దరూ విచారణలో అంగీకరించినట్లు పోలీసులు తెలిపారు. అనంతరం జూన్ 18న లోహగడ్ కోట వద్ద కేతన్ అగర్వాల్‌ను కొండపై నుంచి తోసి హత్య చేసినట్లు వెల్లడించారు.

హత్య జరిగిన రోజు చేతన్ చౌదరి ఉపయోగించిన స్కూటర్‌ను కూడా పోలీసులు స్వాధీనం చేసుకున్నారు. అతడి సమక్షంలో లోహగడ్ కోట వద్ద ఘటనను సీన్‌ రీక్రియేట్‌ చేస్తున్నారు. అలాగే సీసీటీవీ ఫుటేజీలో కనిపించిన వ్యక్తి చేతన్ చౌదరేనని నిర్ధారించేందుకు అతడి నడక తీరుపై (గైట్ అనాలిసిస్) కూడా పోలీసులు పరీక్షలు నిర్వహిస్తున్నారు. కేసు దర్యాప్తు కొనసాగుతోంది.

ఈ కేసులో ప్రత్యక్ష సాక్షులు లేకపోవడం పోలీసులకు పెద్ద సవాల్‌గా మారింది. దీంతో ఆధారాలు, ఫోరెన్సిక్ నివేదికలు, సీసీటీవీ ఫుటేజీలు, నిందితుల వాంగ్మూలాలు వంటి అంశాలపైనే దర్యాప్తు కొనసాగుతోంది. న్యాయస్థానంలో కేసును బలంగా నిరూపించాలంటే ‘పంచశీల సూత్రాల’ ప్రకారం అన్ని ఆధారాలు ఒకదానికొకటి అనుసంధానమై, నిందితులే నేరానికి పాల్పడ్డారని సందేహానికి తావులేకుండా రుజువు చేయాల్సి ఉంటుందని న్యాయ నిపుణులు చెబుతున్నారు.