రాష్ట్రపతి జీవితమే స్ఫూర్తి.. ఆమె ఎదుర్కొన్న దుఃఖాన్ని మనం ఊహించలేం: లోకేశ్ భావోద్వేగ ప్రసంగం

రాష్ట్రపతి ద్రౌపది ముర్ము జీవితం దేశంలోని ప్రతి ఒక్కరికీ, ముఖ్యంగా గిరిజన యువతకు గొప్ప స్ఫూర్తిదాయకమని ఆంధ్రప్రదేశ్ విద్యాశాఖ మంత్రి నారా లోకేశ్ అన్నారు. విశాఖపట్నంలోని కేంద్రీయ గిరిజన విశ్వవిద్యాలయం తొలి స్నాతకోత్సవంలో ఆయన ముఖ్యఅతిథిగా పాల్గొని ప్రసంగించారు. విద్య అనేది కేవలం డిగ్రీలు ప్రదానం చేసే ప్రక్రియ కాదని, అది తరాల భవిష్యత్తును నిర్దేశించే శక్తి అని ఆయన పేర్కొన్నారు.

ఈ సందర్భంగా మంత్రి లోకేశ్, రాష్ట్రపతి ద్రౌపది ముర్ము జీవిత ప్రస్థానాన్ని విద్యార్థులకు స్ఫూర్తిదాయకంగా వివరిస్తూ భావోద్వేగ ప్రసంగం చేశారు. "ఈ విశ్వవిద్యాలయం ఎందుకు ముఖ్యమో చెప్పడానికి మన ప్రియతమ రాష్ట్రపతి జీవితం కంటే గొప్ప ఉదాహరణ లేదు. ఒడిశాలోని మయూర్‌భంజ్ జిల్లా ఉపర్‌బేడా అనే చిన్న గిరిజన గ్రామంలో పుట్టిన ఆమె, పాఠశాలకు వెళ్లడమే కష్టమైన పరిస్థితులను ఎదుర్కొన్నారు. ఆ రోజుల్లో గిరిజన బాలికలు ఉన్నత విద్యను అభ్యసించడం చాలా అరుదు. అయినప్పటికీ, తన గ్రామం నుంచి గ్రాడ్యుయేషన్ పూర్తి చేసిన మొదటి మహిళగా ఆమె నిలిచారు. ఆ ఒక్క అడుగు ఆమె భవిష్యత్తునే కాకుండా, తర్వాతి తరం అమ్మాయిల ఆకాంక్షలను కూడా మార్చేసింది" అని లోకేశ్ వివరించారు.

రాజకీయాల్లోకి రాకముందు ఆమె ఉపాధ్యాయురాలిగా పనిచేశారని, జీవితాలను తీర్చిదిద్దడంలోనే తనకు అత్యంత సంతృప్తి లభించిందని ఆమె తరచూ చెబుతారని గుర్తుచేశారు. "ఆమె ప్రజా జీవితం ఎప్పుడూ ప్రత్యేకాధికారాలతో నిర్మితం కాలేదు. కౌన్సిలర్‌గా మొదలై, వైస్ ఛైర్‌పర్సన్, ఎమ్మెల్యే, మంత్రి, గవర్నర్, చివరకు భారత రాష్ట్రపతి స్థాయికి అంచెలంచెలుగా ఎదిగారు. ప్రతి మైలురాయిని సంవత్సరాల ప్రజా సేవ ద్వారానే ఆమె సాధించారు" అని లోకేశ్ కొనియాడారు.

ఆమె జీవితంలో ఎదుర్కొన్న వ్యక్తిగత విషాదాలను కూడా లోకేశ్ ప్రస్తావించారు. "2009 నుంచి 2014 మధ్య కాలంలో ఇద్దరు కుమారులు, భర్త, తల్లి, సోదరుడిని కోల్పోయారు. అటువంటి దుఃఖాన్ని మనలో చాలా మంది ఊహించలేరు. అయినా ఆమె నిరాశకు లొంగిపోలేదు. ఆధ్యాత్మికతలో లీనమై, ప్రజా సేవలోకి తిరిగి వచ్చి, తన వ్యక్తిగత బాధను ఇతరుల పట్ల కరుణగా మార్చుకున్నారు. పేదలు కలలు కనడమే కాదు, వాటిని నెరవేర్చుకోగలరనడానికి నా ఎన్నికలే నిదర్శనం అని ఆమె రాష్ట్రపతిగా ప్రమాణం చేసినప్పుడు చెప్పారు. ఆ మాటలు కేవలం ఉత్సవ ప్రసంగం కాదు, అది అడ్డంకులను ఎదుర్కొని జీవించిన జీవిత సారం," అని లోకేశ్ ఉద్వేగంగా అన్నారు.

ప్రధాని నరేంద్ర మోదీ స్ఫూర్తితో, ముఖ్యమంత్రి చంద్రబాబు నాయకత్వంలో ఆంధ్రప్రదేశ్‌లో ఉన్నత విద్యా వ్యవస్థలో విప్లవాత్మక మార్పులు తీసుకువస్తున్నామని లోకేశ్ తెలిపారు. "ప్రతి విద్యార్థికి ఉపాధి, ప్రతి విశ్వవిద్యాలయం వినూత్నంగా, ప్రతి పరిశోధకుడు శక్తిమంతుడిగా ఉండాలన్నదే మా లక్ష్యం. ప్రపంచంలో అత్యుత్తమ ప్రతిభతో పోటీపడే ఆత్మవిశ్వాసాన్ని ప్రతి యువకుడిలో నింపాలనుకుంటున్నాం" అని ఆయన స్పష్టం చేశారు.

విద్యార్థులకు సందేశమిస్తూ, "విజయాన్ని మీరు పొందే పదవితో కాకుండా, మీరు సృష్టించే మార్పుతో, మీరు తాకిన జీవితాలతో కొలవండి. డిగ్రీ మీకు వృత్తిని ఇవ్వొచ్చు, కానీ శీలం గౌరవాన్ని, సేవ వారసత్వాన్ని ఇస్తాయి. మీలో కొందరు రాజకీయాల్లోకి వచ్చి దేశ రాజకీయ గమనాన్ని మార్చాలని నేను ఆకాంక్షిస్తున్నాను" అని లోకేశ్ పిలుపునిచ్చారు. ఈ కార్యక్రమంలో రాష్ట్రపతి ద్రౌపది ముర్ము, గవర్నర్ అబ్దుల్ నజీర్, కేంద్ర విద్యాశాఖ మంత్రి ధర్మేంద్ర ప్రధాన్ తదితరులు పాల్గొన్నారు.