విశాఖలో ఘనంగా గిరిజన వర్సిటీ స్నాతకోత్సవం... రాష్ట్రపతికి స్వాగతం పలికిన మంత్రి నారా లోకేశ్

విశాఖపట్నంలోని కేంద్రీయ గిరిజన విశ్వవిద్యాలయం (సెంట్రల్ ట్రైబల్ యూనివర్సిటీ) తొలి స్నాతకోత్సవం మంగళవారం నాడు ఘనంగా జరిగింది. ఈ కార్యక్రమానికి రాష్ట్రపతి ద్రౌపది ముర్ము ముఖ్య అతిథిగా హాజరై విద్యార్థులకు పట్టాలు ప్రదానం చేశారు. మొత్తం 373 మంది డిగ్రీ, పీజీ విద్యార్థులకు ఆమె చేతుల మీదుగా పట్టాలు అందజేశారు. చదువులో అత్యుత్తమ ప్రతిభ కనబరిచిన 13 మంది విద్యార్థులకు స్వర్ణ పతకాలను బహూకరించారు.

ఈ స్నాతకోత్సవంలో రాష్ట్రపతితో పాటు గవర్నర్ అబ్దుల్ నజీర్, కేంద్ర విద్యాశాఖ మంత్రి ధర్మేంద్ర ప్రధాన్, రాష్ట్ర మంత్రులు నారా లోకేశ్, వంగలపూడి అనిత, గుమ్మడి సంధ్యారాణి పాల్గొన్నారు. వీరితో పాటు విశ్వవిద్యాలయం వైస్ ఛాన్సలర్ కట్టమణి, రిజిస్ట్రార్ జితేంద్ర మోహన్ తదితరులు హాజరయ్యారు.

అంతకుముందు, ఈ కార్యక్రమంలో పాల్గొనేందుకు విశాఖపట్నం విమానాశ్రయానికి చేరుకున్న రాష్ట్రపతి ద్రౌపది ముర్ముకు ఘన స్వాగతం లభించింది. రాష్ట్ర గవర్నర్ అబ్దుల్ నజీర్‌తో కలిసి స్పీకర్ అయ్యన్నపాత్రుడు, మంత్రులు నారా లోకేశ్, అనిత ఆమెకు సాదరంగా స్వాగతం పలికారు. 

ఈ సందర్భంగా రాష్ట్ర మంత్రి నారా లోకేశ్ ట్వీట్ చేశారు. "రాష్ట్రపతి ద్రౌపది ముర్ము గారికి విశాఖపట్నంలో స్వాగతం పలకడం గౌరవంగా భావిస్తున్నాను. ఆంధ్రప్రదేశ్‌కు వచ్చిన మీకు హృదయపూర్వక స్వాగతం" అని ఆయన తన ట్వీట్‌లో పేర్కొన్నారు.