చెట్లు కూడా ప్రాణమున్న జీవులు .. వాటికి హక్కులూ ఉన్నాయి.. కెనడాలో చారిత్రాత్మక తీర్మానం

పర్యావరణ పరిరక్షణలో ప్రపంచవ్యాప్తంగా సరికొత్త చర్చకు దారితీసే ఓ చారిత్రాత్మక నిర్ణయం వెలువడింది. కెనడాలోని క్యూబెక్ ప్రావిన్స్‌లో ఉన్న టెరాస్-వౌడ్రూయిల్ అనే చిన్న పట్టణం, చెట్లను ప్రాణం ఉన్న జీవులుగా అధికారికంగా గుర్తించింది. వాటికి కూడా హక్కులు ఉంటాయని స్పష్టం చేస్తూ జూన్ 9న పట్టణ కౌన్సిల్ ఏకగ్రీవంగా తీర్మానాన్ని ఆమోదించింది. ఈ నిర్ణయంతో చెట్లకు హక్కులు కల్పించిన కెనడాలోని తొలి మున్సిపాలిటీగా ఈ పట్టణం నిలిచింది.

మాంట్రియల్ ద్వీపానికి పశ్చిమాన ఉన్న టెరాస్-వౌడ్రూయిల్ జనాభా కేవలం 2,000 మాత్రమే. ఈ పట్టణ కౌన్సిల్ "యూనివర్సల్ డిక్లరేషన్ ఆఫ్ ది రైట్స్ ఆఫ్ ది ట్రీ" అనే అంతర్జాతీయ పర్యావరణ ఉద్యమానికి మద్దతుగా ఈ తీర్మానం చేసింది. ఈ తీర్మానంలో మూడు కీలక అంశాలను పొందుపరిచారు. మొదటిది - చెట్లు ప్రాణం ఉన్న జీవులు, మానవాళికి ఉమ్మడి సంపద. రెండవది - భూమిపై జీవం వాటి ఉనికిపైనే ఆధారపడి ఉంది. మూడవది - మానవులు వాటితో సోదరభావంతో, సంఘీభావంతో వ్యవహరించాలి.

ఈ వినూత్న నిర్ణయం వెనుక క్యూబెక్ ఫిల్మ్ మేకర్ ఆండ్రీ డెస్‍రోచర్స్ తీసిన "డెస్ ఆర్బ్స్ ఎట్ డెస్ ఆర్ట్స్" (Des arbes et des arts) అనే సినిమా స్ఫూర్తిగా నిలిచిందని మేయర్ మిచెల్ బోర్డో తెలిపారు. ఈ సినిమా ప్రదర్శన అనంతరం చెట్లను వస్తువులుగా కాకుండా ప్రాణులుగా గుర్తించడంపై పట్టణంలో విస్తృతమైన ప్రజా చర్చ జరిగింది. ఈ చర్చల ఫలితంగా టెరాస్-వౌడ్రూయిల్ పర్యావరణ కమిటీ ద్వారా మున్సిపల్ కౌన్సిల్‌కు ఒక అధికారిక విజ్ఞప్తి అందింది. దీని ఆధారంగానే కౌన్సిల్ ఈ చారిత్రాత్మక తీర్మానాన్ని ఆమోదించింది. ప్రపంచవ్యాప్తంగా తమ తీర్మానానికి 87,000 మందికి పైగా మద్దతు తెలిపారని టౌన్ కౌన్సిల్ ఒక ప్రకటనలో పేర్కొంది.

"ఈ తీర్మానాన్ని ఆమోదించడం ద్వారా, సుస్థిరమైన భవిష్యత్తును నిర్మించాలన్న మా నిబద్ధతను పునరుద్ఘాటిస్తున్నాం. ఈ గుర్తింపునకు అనుగుణంగా పట్టణంలోని పచ్చదనాన్ని కాపాడటానికి, కొత్త మొక్కలు నాటడానికి, చెట్ల ప్రాముఖ్యతపై ప్రజల్లో అవగాహన పెంచడానికి నిర్దిష్ట కార్యక్రమాలను చేపడతాం" అని మేయర్ బోర్డో వివరించారు. ఈ నిర్ణయం ద్వారా తమ పట్టణం స్థానిక భూభాగాలను రక్షించడంలో బలమైన నాయకత్వాన్ని ప్రదర్శించిందని ఆయన అభిప్రాయపడ్డారు.

ఈ సినిమాను రూపొందించడం వెనుక తన ఉద్దేశాన్ని ఫిల్మ్ మేకర్ డెస్‍రోచర్స్ వివరించారు. ప్రపంచానికి తామే కేంద్రమని భావించే మానవుల అహంకారపూరిత దృక్పథాన్ని మార్చాలని తాను లక్ష్యంగా పెట్టుకున్నానని అన్నారు. "ఈ సినిమాతో మానవులను జీవ ప్రపంచంలో ఒక భాగంగా గుర్తించే పర్యావరణ కేంద్ర సమాజంగా మార్చడానికి నేను ప్రయత్నించాను. అంతేగానీ మానవులే కేంద్రం అనే భావనను తొలగించాలనుకున్నాను" అని ఆయన పేర్కొన్నారు.

కెనడాకు చెందిన లాభాపేక్షలేని సంస్థ 'ఇంటర్నేషనల్ అబ్జర్వేటరీ ఆఫ్ నేచర్ రైట్స్' కూడా ఈ విషయాన్ని ధ్రువీకరించింది. చెట్ల హక్కుల ప్రకటనను అధికారికంగా ఆమోదించిన తొలి కెనడా మున్సిపాలిటీ టెరాస్-వౌడ్రూయిలేనని పేర్కొంది. సుస్థిర అభివృద్ధి సూత్రాలకు అనుగుణంగా మున్సిపల్ అధికార యంత్రాంగం ఎంత బలంగా పనిచేయగలదో ఈ తీర్మానం నిరూపిస్తోందని అభిప్రాయపడింది. ఈ మార్గంలో పయనించేందుకు అనేక ఇతర మున్సిపాలిటీలకు టెరాస్-వౌడ్రూయిల్ ఆదర్శంగా నిలుస్తుందని ఆశాభావం వ్యక్తం చేసింది.