20 ఏళ్లకే అద్భుతం.. యంగెస్ట్ ఐరన్‌మ్యాన్‌గా ఐఐటీ మద్రాస్ విద్యార్థిని!

భారత క్రీడా రంగంలో ఓ యువ సంచలనం సరికొత్త చరిత్ర సృష్టించింది. కేవలం 20 ఏళ్ల వయసులోనే ఐఐటీ మద్రాస్ విద్యార్థిని రేనీ నొరోన్హా, 'భారతపు అతి పిన్న వయస్కురాలైన మహిళా ఐరన్‌మ్యాన్‌'గా అరుదైన ఘనత సాధించింది. పట్టుదల, కృషి ఉంటే సాధించలేనిది ఏదీ లేదని నిరూపిస్తూ, ఆమె నేటి యువతకు ఆదర్శంగా నిలుస్తోంది.

ఇటీవల ఫిలిప్పీన్స్‌లో జరిగిన 'సెంచరీ ట్యూనా ఐరన్‌మ్యాన్' పోటీలో రేనీ తన సత్తా చాటింది. 18-24 ఏళ్ల వయసు కేటగిరీలో 15 గంటల 55 నిమిషాల 37 సెకన్లలో రేసును పూర్తి చేసి ప్రథమ స్థానంలో నిలిచింది. ఈ విజయంతో 2026లో హవాయిలో జరగనున్న ప్రతిష్ఠాత్మక ఐరన్‌మ్యాన్ వరల్డ్ ఛాంపియన్‌షిప్‌కు అర్హత సాధించింది. ఐరన్‌మ్యాన్ అనేది 3.8 కిలోమీటర్ల స్విమ్మింగ్, 180 కిలోమీటర్ల సైక్లింగ్, 42.2 కిలోమీటర్ల మారథాన్‌తో కూడిన అత్యంత కఠినమైన పోటీ.

రేనీ ఈ ఘనత సాధించడం ఇదే తొలిసారి కాదు. 2023లో 18 ఏళ్ల 49 రోజుల వయసులోనే న్యూజిలాండ్‌లో ఐరన్‌మ్యాన్ రేసును పూర్తి చేసి, ఈ పోటీని ముగించిన అతి పిన్న వయస్కురాలైన భారతీయ మహిళగా రికార్డు సృష్టించింది. ఒకప్పుడు ప్రొఫెషనల్ ఆర్టిస్టిక్ జిమ్నాస్ట్‌గా రాణించిన ఆమె, 16 ఏళ్ల వయసులో క్రీడల వైపు అడుగులు వేసింది.

ప్రస్తుతం లండన్‌లో ఉంటూనే ఐఐటీ మద్రాస్‌లో బీఎస్సీ డేటా సైన్స్ అండ్ అప్లికేషన్స్ కోర్సును రిమోట్ విధానంలో చదువుకుంటోంది. 21 ఏళ్లు నిండకముందే ఆరు ఖండాల్లో ఐరన్‌మ్యాన్ పోటీలను పూర్తి చేసి గిన్నిస్ వరల్డ్ రికార్డు నెలకొల్పడమే తన లక్ష్యమని రేనీ చెబుతోంది. చదువు, క్రీడలు రెండింటినీ సమన్వయం చేసుకుంటూ ఆమె సాధిస్తున్న విజయాలు ఎందరికో స్ఫూర్తినిస్తున్నాయి.