ఐపీఎల్‌ 2026 ఫైనల్లో ఓటమితో నిరాశలో ఉన్న గుజరాత్ టైటాన్స్ (జీటీ) జట్టుకు పెను ప్రమాదం తృటిలో తప్పింది. నిన్న‌ రాత్రి ఫైనల్ మ్యాచ్ ముగిసిన తర్వాత స్టేడియం నుంచి హోటల్‌కు తిరిగి వెళ్తుండగా, వారు ప్రయాణిస్తున్న బస్సులో అగ్నిప్రమాదం సంభవించింది. అప్రమత్తమైన సిబ్బంది వెంటనే ఆటగాళ్లందరినీ సురక్షితంగా కిందకు దించడంతో అంతా ఊపిరి పీల్చుకున్నారు.

వివరాల్లోకి వెళితే.. అహ్మదాబాద్‌లోని నరేంద్ర మోదీ స్టేడియంలో రాయల్ ఛాలెంజర్స్ బెంగళూరుతో జరిగిన ఫైనల్ మ్యాచ్‌లో గుజరాత్ టైటాన్స్ 5 వికెట్ల తేడాతో ఓటమి పాలైంది. మ్యాచ్ అనంతరం హోటల్‌కు వెళ్తుండగా బస్సులో షార్ట్ సర్క్యూట్ కారణంగా మంటలు చెలరేగాయి. ఈ ఘటనతో ఆటగాళ్లు దాదాపు గంటపాటు రోడ్డుపైనే చిక్కుకుపోయారు. ఎలాంటి హానీ జరగకపోవడంతో యాజమాన్యం, అభిమానులు ఊపిరి పీల్చుకున్నారు.

ఫైనల్ ఓటమికి ప్రయాణ బడలిక ఒక కారణమా అని అడిగినప్పుడు, గుజరాత్ టైటాన్స్ క్రికెట్ డైరెక్టర్ విక్రమ్ సోలంకి స్పందించారు. "కొన్ని రోజులుగా ఎక్కువ మ్యాచ్‌లు ఆడటం, ప్రయాణ బడలిక వల్ల ఓడిపోయామని చెప్పి ఆర్‌సీబీ విజయాన్ని తక్కువ చేయదల్చుకోలేదు. అది మా పద్ధతి కాదు" అని ఆయన స్పష్టం చేశారు. "మేం చేసిన 155/8 స్కోరు తక్కువే అయినప్పటికీ, మా బౌలర్లు గట్టిగా పోరాడారు. కొన్నిసార్లు ప్రత్యర్థి జట్టు కూడా అద్భుతంగా ఆడుతుందని అంగీకరించాలి" అని ఆయన వివరించారు. వరుస ప్రయాణాలు, ప్రతికూల వాతావరణం కారణంగా ఫైనల్‌కు ఆలస్యంగా అహ్మదాబాద్ చేరుకున్న గుజరాత్ జట్టుకు, ఈ అగ్నిప్రమాదం మరింత ఆందోళన కలిగించింది.