మోకిల విల్లా వివాదం: హైదరాబాద్ దంపతులకు భారీ ఊరట

హైదరాబాద్‌లో విల్లా కొనుగోలు చేసిన దంపతులకు తెలంగాణ రాష్ట్ర వినియోగదారుల కమిషన్ భారీ ఊరటనిచ్చింది. నగర శివార్లలోని మోకిల సమీపంలో ఓ విల్లా ప్రాజెక్టులో నిర్మాణం ప్రారంభించకుండా ఒప్పందాన్ని ఉల్లంఘించిన బిల్డర్‌కు గట్టి షాకిచ్చింది. కొనుగోలుదారులకు చెల్లించిన పూర్తి మొత్తం రూ.1.08 కోట్లను వడ్డీతో సహా తిరిగి చెల్లించాలని ఆదేశిస్తూ కీలక తీర్పు వెలువరించింది.

వివరాల్లోకి వెళితే.. హైదరాబాద్‌కు చెందిన కోకా శ్రీకృష్ణపాత్రులు, ఆయన భార్య రంగారెడ్డి జిల్లా, శంకరపల్లి మండలం, మోకిలలోని 'సార్క్ ప్రైమ్ నార్త్ మెడోస్-2' ప్రాజెక్టులో ఓ విల్లాను బుక్ చేసుకున్నారు. 2,600 చదరపు అడుగుల విస్తీర్ణంలో ఉన్న ఈ విల్లా కోసం వారు మొత్తం రూ.1.08 కోట్లు చెల్లించారు. 2021 మార్చిలో బిల్డర్‌తో ఒప్పందం చేసుకున్న ఈ దంపతులు, 2022 నాటికి పూర్తి మొత్తం చెల్లించారు.

ఒప్పందం ప్రకారం 36 నెలల నిర్మాణ కాలపరిమితి, 6 నెలల గ్రేస్ పీరియడ్‌తో కలిపి 2024 సెప్టెంబర్ నాటికి విల్లాను అప్పగించాల్సి ఉంది. అయితే, గడువు సమీపిస్తున్నా బిల్డర్ కనీసం నిర్మాణ పనులు కూడా ప్రారంభించలేదు. దీంతో బాధితులు వినియోగదారుల కమిషన్‌ను ఆశ్రయించారు.

ఈ కేసును విచారించిన కమిషన్, బిల్డర్ వైఖరిని తీవ్రంగా తప్పుబట్టింది. నిర్మాణ పనులు ప్రారంభించకపోవడానికి సరైన కారణాలు చూపలేదని, హెచ్‌ఎండీఏ అనుమతులు లేదా ఇతర సమస్యలపై ఆధారాలు సమర్పించలేదని పేర్కొంది. ఏకపక్ష ఒప్పందాలతో వినియోగదారులను నిరవధికంగా వేచి ఉండేలా చేయడం సరికాదని స్పష్టం చేసింది. ఈ నేపథ్యంలో, దంపతులకు అసలు మొత్తం రూ.1.08 కోట్లను 12 శాతం వడ్డీతో పాటు తిరిగి చెల్లించాలని బిల్డర్‌ను ఆదేశించింది. అంతేకాకుండా, మానసిక వేదనకు గురిచేసినందుకు రూ.3 లక్షల నష్టపరిహారం, కేసు ఖర్చుల కింద మరో రూ.15,000 చెల్లించాలని తీర్పు ఇచ్చింది.

జస్టిస్ డా. జి. రాధా రాణి నేతృత్వంలోని బెంచ్ ఇచ్చిన ఈ తీర్పు, ప్రీ-లాంచ్ ప్రాజెక్టులలో పెట్టుబడి పెట్టే గృహ కొనుగోలుదారుల హక్కులకు మరింత బలాన్ని చేకూర్చిందని న్యాయ నిపుణులు అభిప్రాయపడుతున్నారు.