బెంగళూరు వర్సెస్ హైదరాబాద్... కెనడా వ్యక్తి ఓటు ఏ నగరానికంటే...!

హైదరాబాద్ నగరంలోని రోడ్లను ప్రశంసిస్తూ కెనడాకు చెందిన కాలెబ్ ఫ్రైసెన్ అనే వ్యక్తి పోస్ట్ చేసిన ఓ వీడియో సోషల్ మీడియాలో వైరల్ అవుతోంది. భాగ్యనగర రహదారుల నాణ్యతకు ముగ్ధుడైన ఆ విదేశీయుడు, బెంగళూరులో ఇలాంటి మౌలిక సదుపాయాలు ఎందుకు లేవని ప్రశ్నించాడు. ఈ వీడియో నెట్టింట ఆసక్తికర చర్చకు దారితీసింది.

కారులో ప్రయాణిస్తూ ఫ్రైసెన్ తీసిన వీడియోలో హైదరాబాద్ రోడ్లను చూపిస్తూ తన ఆశ్చర్యాన్ని వ్యక్తం చేశాడు. "హైదరాబాద్‌లో ఈ రోడ్లు అద్భుతంగా ఉన్నాయి. నగరం లోపల ఉన్నప్పటికీ ప్రతిచోటా రోడ్లు విశాలంగా, అద్భుతంగా ఉన్నాయి. ఒక్క గుంత కూడా కనిపించడం లేదు. రోడ్లపైకి జంతువులు గానీ, పాదచారులు గానీ అకస్మాత్తుగా రావడం లేదు. బెంగళూరులో ఇందుకు పూర్తి భిన్నంగా ఎందుకు ఉంది?" అని అతడు ఆశ్చర్యం వ్యక్తం చేశాడు.

ఇన్‌స్టాగ్రామ్‌లో వీడియోతో పాటు పెట్టిన క్యాప్షన్‌లో, హైదరాబాద్ ప్రధాన రోడ్లు చాలా బాగున్నాయని, బెంగళూరుతో పోలిస్తే ట్రాఫిక్ సమస్య తక్కువని పేర్కొన్నాడు. "నాణ్యమైన రోడ్లు, ఫ్లైఓవర్ల నిర్మాణంతో ఇక్కడ ట్రాఫిక్‌ను సమర్థంగా నియంత్రిస్తున్నారు. గంటల తరబడి ట్రాఫిక్‌లో చిక్కుకునే పరిస్థితి లేదు" అని ఫ్రైసెన్ రాసుకొచ్చాడు.

ఈ వీడియోపై నెటిజన్లు మిశ్రమంగా స్పందిస్తున్నారు. చాలామంది ఫ్రైసెన్ అభిప్రాయంతో ఏకీభవిస్తూ హైదరాబాద్ రోడ్లను పొగడగా, మరికొందరు "మీరు కేవలం హైదరాబాద్‌లోని మంచి ప్రాంతాలనే చూసి ఉంటారు" అని వ్యాఖ్యానించారు. "హైదరాబాద్‌ను మరీ పొగడకండి, ఇక్కడ కూడా అద్దెలు పెరిగిపోతాయి" అంటూ కొందరు సరదాగా కామెంట్లు పెడుతున్నారు.