15 ఏళ్ల కుర్రాడిలో బ్రాడ్‌మన్.. వైభవ్ మ‌మ్మ‌ల్ని నిజంగా భ‌య‌పెట్టాడు: లక్నో కోచ్ జస్టిన్ లాంగర్

లక్నో సూపర్ జెయింట్స్ కోచ్, ఆస్ట్రేలియా మాజీ క్రికెటర్ జస్టిన్ లాంగర్.. రాజస్థాన్ రాయల్స్ యువ సంచలనం వైభవ్ సూర్యవంశీపై ప్రశంసల వర్షం కురిపించాడు. కేవలం 15 ఏళ్ల వయసున్న ఈ కుర్రాడిలో తనకు క్రికెట్ దిగ్గజం సర్ డొనాల్డ్ బ్రాడ్‌మన్ తరహా ఆటతీరు, పరిస్థితులకు తగ్గట్లు మారే నైపుణ్యం కనిపిస్తోందని సంచలన వ్యాఖ్యలు చేశాడు. మంగళవారం లక్నోతో జరిగిన మ్యాచ్‌లో రాజస్థాన్ 221 పరుగుల భారీ లక్ష్యాన్ని ఛేదించడంలో సూర్యవంశీ కీలక పాత్ర పోషించాడు. కేవలం 36 బంతుల్లో 94 పరుగుల విధ్వంసకర ఇన్నింగ్స్‌తో లక్నో ఓటమిని శాసించాడు.

మ్యాచ్ అనంతరం మీడియాతో మాట్లాడిన లాంగర్.. సూర్యవంశీ ఇన్నింగ్సే తమ ఓటమికి, రాజస్థాన్ గెలుపుకు మధ్య తేడా అని స్పష్టం చేశాడు. "అతను 36 బంతుల్లో 94 పరుగులు చేశాడు. కేవలం మూడు ఓవర్లలోనే 73 పరుగులు రాబట్టడంలో అతనిదే కీలక పాత్ర. మ్యాచ్ ఫలితాన్ని మార్చింది అతనే. మా యువ బౌలర్లకు ఇది ఒక మంచి గుణపాఠం" అని లాంగర్ వివరించాడు.

సూర్యవంశీ బ్యాటింగ్ తీరు చూస్తుంటే ఊపిరి బిగపట్టాల్సి వస్తోందని లాంగర్ అన్నాడు. "గత మ్యాచ్‌లో మిచెల్ స్టార్క్, అన్రిచ్ నోర్జే వంటి ప్రపంచ స్థాయి బౌలర్లు అతడికి బౌలింగ్ వేస్తున్నప్పుడు వారి ముఖాల్లో 'ఇక్కడ ఏం జరుగుతోంది?' అనే నిస్సహాయత స్పష్టంగా కనిపించింది. ఇది చూసి నాకే ఆశ్చర్యం వేసింది. ప్రస్తుతం ఆరెంజ్ క్యాప్ హోల్డర్‌గా ఉన్న సూర్యవంశీ, ఇంత చిన్న వయసులో ఇలా ఆడుతుంటే భవిష్యత్తులో ఎలా ఆడతాడో ఊహించుకుంటేనే భయంగా ఉంది. ఇంకా బ్యాటింగ్ పూర్తిగా నేర్చుకోకముందే ఇలా ఆడుతున్నాడు. ఇక పూర్తిగా నేర్చుకుంటే పరిస్థితి ఏంటి?" అంటూ ఆశ్చర్యం వ్యక్తం చేశాడు.

ఆస్ట్రేలియా, ఇంగ్లండ్ వంటి కఠినమైన పిచ్‌లపై కూడా సూర్యవంశీ రాణించగలడా అని ప్రశ్నించగా, లాంగర్ బ్రాడ్‌మన్‌తో పోలుస్తూ సమాధానమిచ్చాడు. "ఆధునిక క్రికెట్‌లో హెల్మెట్లు ఉన్న రోజుల్లో బ్రాడ్‌మన్ ఇన్ని పరుగులు చేసేవాడా అని నన్ను అడుగుతారు. ఆయన కచ్చితంగా పరిస్థితులకు అలవాటుపడి రాణించేవాడని నేను చెబుతాను. సూర్యవంశీ కూడా అలాంటివాడే. అతడికి ఎక్కడ బౌలింగ్ చేయాలో బౌలర్లకే అర్థం కావడం లేదు. కాబట్టి అతను ఏ దేశంలో ఆడినా తన ఆటను పరిస్థితులకు అనుగుణంగా మార్చుకోగలడు" అని లాంగర్ పేర్కొన్నాడు. సూర్యవంశీ నిరంతరం మెరుగవుతూనే ఉంటాడని, ఇది ప్రపంచ క్రికెట్‌కు భయానకమైన విషయం అని చెప్పుకొచ్చాడు.