తమిళనాడు ఎన్నికల్లో విదేశీయుల దొంగ ఓట్లు... ఆపై పరారీకి యత్నం... అరెస్ట్!

తమిళనాడు అసెంబ్లీ ఎన్నికల్లో నకిలీ గుర్తింపు పత్రాలు ఉపయోగించి ఓటు హక్కు వినియోగించుకున్నారన్న ఆరోపణలపై సుమారు 25 మంది విదేశీయులను అరెస్ట్ చేశారు. ఓటు వేసిన తర్వాత దేశం విడిచి పారిపోయేందుకు ప్రయత్నిస్తున్న వీరిని విమానాశ్రయాల్లో అదుపులోకి తీసుకున్నట్లు పోలీసులు గురువారం వెల్లడించారు. ఈ ఘటన రాష్ట్ర రాజకీయాల్లో తీవ్ర కలకలం రేపింది.

వివరాల్లోకి వెళితే, ఇటీవల ఏప్రిల్ 23న తమిళనాడు అసెంబ్లీ ఎన్నికలు జరిగాయి. ఈ ఎన్నికల్లో కొందరు విదేశీయులు మోసపూరితంగా ఓట్లు వేశారని ఇంటెలిజెన్స్ వర్గాలకు సమాచారం అందింది. దీంతో చెన్నై, మదురై వంటి ప్రధాన విమానాశ్రయాల్లో ఇమ్మిగ్రేషన్ అధికారులను అప్రమత్తం చేశారు. దేశం విడిచి వెళ్లేందుకు వచ్చిన ప్రయాణికులను తనిఖీ చేస్తుండగా, కొందరి చూపుడు వేళ్లపై ఎన్నికల సిరా ఉండటాన్ని అధికారులు గుర్తించారు. విచారణలో వారు విదేశీ పౌరులని తేలడంతో వారిని అదుపులోకి తీసుకుని స్థానిక పోలీసులకు అప్పగించారు.

అరెస్టయిన వారిలో ఎక్కువ మంది శ్రీలంక పౌరులు కాగా, బ్రిటిష్, కెనడియన్ పౌరులు కూడా ఉన్నారని దర్యాప్తు అధికారులు తెలిపారు. నిందితులపై భారతీయ న్యాయ సంహిత (బీఎన్ఎస్) 2023 కింద కేసు నమోదు చేసి చట్టపరమైన చర్యలు ప్రారంభించారు.

ఈ దొంగ ఓట్లు ఎన్నికల ఫలితాలపై ప్రభావం చూపాయా అని మీడియా ప్రశ్నించగా, ఒక సీనియర్ అధికారి స్పందించడానికి నిరాకరించారు. అయితే, ఈ ఘటనపై పూర్తి వివరాలతో కేంద్ర ఎన్నికల సంఘానికి (ఈసీ) నివేదిక సమర్పించినట్లు ఆయన ధృవీకరించారు. ఎన్నికలకు ముందు భారత్‌కు వచ్చి ఇంకా తిరిగి వెళ్లని ఇతర విదేశీయుల వివరాలపై కూడా దర్యాప్తు కొనసాగుతోంది.