రింకూ సింగ్ అద్భుతం.. సూప‌ర్ ఓవ‌ర్‌లో లక్నోపై కోల్‌కతా థ్రిల్లింగ్ విక్టరీ!

ఐపీఎల్ 2026లో కోల్‌కతా నైట్ రైడర్స్‌ను ఒంటిచేత్తో నడిపిస్తున్న రింకూ సింగ్ మరోసారి తన విశ్వరూపం ప్రదర్శించాడు. ఓటమి అంచున నిలిచిన జట్టును తన అసాధారణ పోరాటంతో గెలుపు తీరాలకు చేర్చాడు. లక్నో వేదికగా ఆదివారం జరిగిన ఉత్కంఠభరిత మ్యాచ్‌లో లక్నో సూపర్ జెయింట్స్‌పై సూపర్ ఓవర్‌లో కోల్‌కతా నైట్ రైడర్స్ అద్భుత విజయం సాధించింది. బ్యాటింగ్‌లో అజేయంగా 83 పరుగులు, ఫీల్డింగ్‌లో నాలుగు క్యాచ్‌లు, సూపర్ ఓవర్‌లో కీలక క్యాచ్, విజయం కోసం చక్క‌టి ఫోర్‌తో రింకూ సింగ్ ఈ మ్యాచ్‌లో వన్ మ్యాన్ ఆర్మీలా నిలిచాడు.

మొదట బ్యాటింగ్ చేసిన కోల్‌కతా నైట్ రైడర్స్, లక్నో బౌలర్ మొహ్సిన్ ఖాన్ (5/23) ధాటికి కుదేలైంది. కేవలం 73 పరుగులకే 6 వికెట్లు కోల్పోయి పీకల్లోతు కష్టాల్లో పడింది. అజింక్యా రహానే నెమ్మదిగా ఆడగా, టిమ్ సీఫెర్ట్ వరుసగా రెండో మ్యాచ్‌లో డకౌట్ అయ్యాడు. అంగ్క్రిష్ రఘువంశీ "అబ్స్ట్రక్టింగ్ ది ఫీల్డ్" కారణంగా ఔటవ్వడం వివాదాస్పదమైంది. కామెరాన్ గ్రీన్ (34) కాసేపు పోరాడినా, మొహ్సిన్ తన ఐదు వికెట్ల ప్రదర్శనతో కేకేఆర్ పతనాన్ని శాసించాడు.

ఈ దశలో క్రీజులోకి వచ్చిన రింకూ సింగ్ అసమాన పోరాట పటిమ కనబరిచాడు. ఒకవైపు వికెట్లు పడుతున్నా ఒత్తిడిని జయించి నిలబడ్డాడు. ఆరంభంలో ఆచితూచి ఆడినా, చివరి ఓవర్లలో విధ్వంసం సృష్టించాడు. ముఖ్యంగా మహమ్మద్ షమీ, దిగ్వేశ్ రాఠీ బౌలింగ్‌లో ఆకాశమే హద్దుగా చెలరేగాడు. చివరి రెండు ఓవర్లలో ఏకంగా 43 పరుగులు రాబట్టాడు. దిగ్వేశ్ రాఠీ వేసిన ఆఖరి ఓవర్‌లో వరుసగా నాలుగు సిక్సర్లు బాదడంతో కోల్‌కతా 20 ఓవర్లలో 7 వికెట్లకు 155 పరుగుల గౌరవప్రదమైన స్కోరు చేయగలిగింది.

156 పరుగుల లక్ష్యంతో బరిలోకి దిగిన లక్నోకు ఆరంభంలోనే ఎదురుదెబ్బ తగిలింది. అయితే, ఎయిడెన్ మార్క్‌రమ్ (31), కెప్టెన్ రిషభ్ పంత్ (42) జట్టును ఆదుకున్నారు. వీరిద్దరూ ఔటైన తర్వాత కేకేఆర్ బౌలర్లు పట్టు బిగించారు. ఆఖరి ఓవర్‌లో లక్నో విజయానికి 17 పరుగులు అవసరమవ్వగా, కార్తీక్ త్యాగి బౌలింగ్‌లో ఉత్కంఠ తారస్థాయికి చేరింది. చివరి బంతికి 7 పరుగులు కావాల్సిన సమయంలో మహమ్మద్ షమీ సిక్సర్ బాదడంతో మ్యాచ్ టై అయి సూపర్ ఓవర్‌కు దారి తీసింది.

సూపర్ ఓవర్‌లో కోల్‌కతా తమ అనుభవజ్ఞుడైన స్పిన్నర్ సునీల్ నరైన్‌పై నమ్మకం ఉంచింది. ఆ నమ్మకాన్ని నరైన్ వంద శాతం నిలబెట్టాడు. కేవలం ఒక్క పరుగు మాత్రమే ఇచ్చి నికోలస్ పూరన్, మార్క్‌రమ్‌లను ఔట్ చేశాడు. మార్క్‌రమ్ వికెట్ విషయంలో బౌండరీ లైన్ వద్ద రోవ్‌మన్ పావెల్ అద్భుతంగా బంతిని మైదానంలోకి విసరగా, రింకూ సింగ్ రీబౌండ్‌లో క్యాచ్ అందుకొని అబ్బురపరిచాడు. అనంతరం రెండు పరుగుల లక్ష్యంతో బరిలోకి దిగిన కేకేఆర్ తరఫున రింకూ సింగ్ ఫోర్ కొట్టి జట్టుకు చిరస్మరణీయ విజయాన్ని అందించాడు. ఈ ఓటమితో లక్నో వరుసగా ఐదో పరాజయాన్ని మూటగట్టుకుని పాయింట్ల పట్టికలో అట్టడుగు స్థానానికి పడిపోయింది.